फाउंटन

"फाउंटनला कोणती बस जाते?"

"बावीस नंबर. म्हणजे बसवर बावीस ही संख्या लिहिली असेल ती. आतापासून येणारी बावीसावी बस नव्हे. हु हु हु"

"हा हा हा. उत्तम विनोद होता."

"धन्यवाद. पण बसवर हुतात्मा चौक लिहिलं असेल - आता फ्लोरा फाउंटन म्हणत नाहीत त्या जागेला."

"अहो पण मी तिथे जातच नाहीये."

"तुम्हीच विचारलंत ना - फाउंटनला कोणती बस जाते?"

"हो, पण फ्लोरा फाउंटन नाही."

"मग?"

"फाॅना फाउंटन!"

"म्हणजे?"

"फ्लोरा म्हणजे वनस्पतीजगत. फाॅना म्हणजे प्राणीजगत. फाॅना फाउंटनजवळ विविध प्रजातींचे प्राणी आढळतात, म्हणून फाॅना फाउंटन."

"खरंच?"

"हो तर. मुंगीपासून निळ्या देवमाशापर्यंत जवळपास स-ग-ळे. हायड्रा, सालामांडर, कोमोडो ड्रॅगन, शहामृग, बिबळ्या. पुण्यवान लोकांना एडियाकारन बायोटासुद्धा दिसतात म्हणे."

"अरे वा. मजाच आहे सगळी."

"हो तर. फारच रोचक जागा आहे. फक्त एकच भीती आहे हो."

"कसली? बिबळ्या हल्ला करेल अशी?"

"नाही. अख्खं फाॅना फाउंटन वनताराला घेऊन जातील याची."