ऑस्ट्रेलियात करोना - एक टाईमलाईन
मूळच्या पुण्याच्या आणि आता सिडनीवासी असलेल्या योगिनी लेले यांनी सूक्ष्मजीवशास्त्र विषयात पदव्युत्तर शिक्षण घेतले आहे व त्याच क्षेत्रात काम करतात. त्यांच्याकडून मिळालेली एक रोचक टाईमलाईन -
तारीख | घटना |
---|---|
१२ डिसेंबर २०१९ | वूहानमधे नॉव्हेल व्हायरसची पहिली केस |
७ जानेवारी २०२० | नवीन व्हायरसची चीनकडून अधिकृत घोषणा, नवीन व्हायरसचे नाव २०१९-nCoV. |
९ जानेवारी | कोरोना व्हायरससंबंधी पहिल्या मृत्यूची नोंद , वूहानमधील एक ६१ वर्षीय पुरुष. |
२० जानेवारी | चीनकडून अधिकृत माहिती प्रसारित : व्हायरस अत्यंत संसर्गजन्य. महासाथ पसरू शकते. |
२० जानेवारी | ऑस्ट्रेलियाच्या बायोसिक्युरिटी ॲक्ट (२०१५) मध्ये नॉव्हेल कोरोना व्हायरसची नोंद . यामुळे ऑस्ट्रेलियाला आपल्या देशांत येणाऱ्या परदेशी प्रवाशांबद्दल वेगळे नियम बनविणे शक्य |
२३ जानेवारी | वूहानबद्दल लेव्हल तीनची प्रवाससूचना. "अत्यंत गरजेचे असल्याशिवाय वूहानला प्रवास करू नका " |
〃 | मास स्क्रिनिंग आणि तापमान चाचणी स्क्रिनिंगचा (रोगप्रसार रोखण्यास) उपयोग होतो अशी नक्की आणि पुरेशी माहिती / पुरावा पुढे न आल्यामुळे एअरपोर्टवर मास स्क्रिनिंग आणि तापमान चाचणी सुरू नाही |
२४ जानेवारी | लेव्हल चारची प्रवाससूचना : "वूहानला आणि हुबेई प्रांताला प्रवास करू नये" |
२५ जानेवारी | ऑस्ट्रेलियातील पहिल्या कोरोना व्हायरससंबंधित पेशंटची नोंद. वूहानमधून १९ जानेवारीला मेलबोर्नमध्ये आलेला प्रवासी. |
〃 | अजून तीन केसेसची सिडनीमधे नोंद. तिघेही वूहानवरून सिडनीला अनुक्रमे ६ जानेवारी, १९ जानेवारी आणि २० जानेवारीला आले होते. |
२७ जानेवारी | न्यू साऊथ वेल्समध्ये अजून एक पेशंट. ऑस्ट्रेलियातील एकूण पाचवा पेशंट. नवीन रोग किती संसर्गजन्य आहे याबद्दल हुबेईमधून नक्की माहिती/पुरावे मिळत नसल्यामुळे येणाऱ्या प्रवाशांचे विलगीकरण नाही. फक्त पेशंटच्या संपर्कात आलेल्या शालेय विद्यार्थ्यांना १४ दिवस सक्तीची सुट्टी. |
२८ जानेवारी | ऑस्ट्रेलियात रोगप्रसार / संसर्ग झाला आहे किंवा कसे याबद्दल पुरेशी माहिती नसल्यामुळे मास्क वापरणे बंधनकारक नाही. |
〃 | सद्यस्थितीत विलगीकरण करणे गरजेचे नाही असा समज |
〃 | प्रवासी सूचना : "चीनला जायचे असेल तर : पुनर्विचार करा" |
२९ जानेवारी | कोरोना पॉझिटिव्ह केसेसच्या संपर्कात आलेल्यांना १४ दिवस होम क्वारंटाईन असा निर्णय |
〃 | मात्र (हुबेई सोडून उर्वरित) चीन किंवा जगाच्या इतर भागांतून येणाऱ्या प्रवाशांना स्व-क्वारंटाईन सक्तीचे नाही. |
३१ जानेवारी | WHOने 'कोरोनाची जागतिक महासाथ आली आहे' अशी घोषणा केली. महासाथ अत्यंत गंभीर असे प्रतिपादन. |
१ फेब्रुवारी | ऑस्ट्रेलियन नागरिक वगळता चीन मधून येणाऱ्या इतर कोणाही प्रवाशाला ऑस्ट्रलियात येण्यास बंदी. प्रवास सूचना चार बदलली. ऑस्ट्रेलियन नागरिकांना चीनमध्ये प्रवास करण्यास बंदी.चीनमधून परत येणाऱ्या प्रवाशांचे १४ दिवस विलगीकरण सक्तीचे. |
२ फेब्रुवारी | ऑस्ट्रेलियात एकूण १४ पेशंट्सची नोंद. (जागतिक स्तरावर १४५६१ केसेस, ३०५ मृत्यू. २.०९ % मृत्युदर ) |
३ फेब्रुवारी | वूहानमधे अडकलेल्या २४३ ऑस्ट्रेलियन नागरिकनांना मायदेशी आणण्यासाठी रवाना झालेल्या क्वांटासच्या फ्लाईटचे आगमन. |
४ फेब्रुवारी | चीनवरून येणाऱ्या सर्व फ्लाईट्स फ्लाईट्स रद्द |
२९ फेब्रुवारी | फेब्रुवारीत १३ नवीन केसेसची नोंद |
१ मार्च | इराणवरून येणाऱ्या सर्व फ्लाईट्सना बंदी |
२ मार्च | ऑस्ट्रेलियात कोरोनासंबंधित रोगामुळे पहिला मृत्यू |
११ मार्च | इटलीहून येणाऱ्या सर्व फ्लाईट्सवर बंदी |
१६ मार्च | पाचशेहून जास्त लोकांना (आऊटडोअर कार्यक्रमानिमित्त) एकत्र येण्यावर निर्बंध |
१७ मार्च | परदेशातून आलेल्या सर्व प्रवाशांना स्व विलगीकरण करणे बंधनकारक. क्रूझ शिप्सना कुठल्याही ऑस्ट्रेलियन बंदरात येण्यास तीस दिवस बंदी. इनडोअर कार्यक्रमांमध्ये जास्तीत जास्त १०० लोकांना एकत्र येण्याची मर्यादा. |
२० मार्च | ऑस्ट्रेलियात येण्यास बिगर-ऑस्ट्रेलियन लोकांना बंदी |
२४ मार्च | पब्स, क्लब्स बंद. रेस्टॉरंट्समध्ये फक्त 'टेक अवे'ला परवानगी. |
२५ मार्च | ऑस्ट्रेलियन नागरिकांना परदेशी जाण्यास मनाई. |
२६ मार्च | चाचण्या करण्याचा निकष बदलला (ज्यायोगे जास्त चाचण्या करता येतील) |
२८ मार्च | बाहेरून आलेल्या सर्व प्रवाशांचे हॉटेल्स मध्ये सक्तीचे विलगीकरण |
३० मार्च | फक्त दोन लोकांना एकत्र येण्यास परवानगी (जसे आपल्याकडे १४४ कलम लागू केले की ही मर्यादा चार लोकांची असते) फक्त गरज असेल तरच घराबाहेर पडावे असे निर्देश |
३१ मार्च | मार्च महिन्यात ४,६७९ नवीन केसेस, २० मृत्यू |
३० एप्रिल | एप्रिल महिन्यात २,०५२ नवीन केसेस |
८ मे | निर्बंध सैल : एका वेळी एका(च) कुटुंबाला दुसऱ्याच्या घरी जाण्यास आणि भेटण्यास परवानगी |
१० मे | ऑस्ट्रेलियन कॅपिटल टेरिटरी कोरोनामुक्त असे जाहीर. |
१५ मे | साऊथ ऑस्ट्रेलिया कोरोनामुक्त. निर्बंध सैल. रेस्टॉरंट्स आणि कॅफेमध्ये जास्तीत जास्त दहा लोकांना परवानगी . सोशल डिस्टन्सिंग पाळणे बंधनकारक. |
〃 | आऊटडोअर : दहा लोकांपर्यंत लोकांना एकत्र येण्यास परवानगी. इनडोअर : जास्तीत जास्त पाच लोकांना एकत्र येण्यास परवानगी. लग्न समारंभ असेल तर दहा निमंत्रित लोकांना परवानगी. |
〃 | मृत्यू / अंत्यदर्शन / अंत्यसंस्कार यासाठी इनडोअर २० आणि आऊटडोअर ३० लोकांना एकत्र येण्यास परवानगी. चर्चमध्ये धार्मिक कार्यक्रम असेल तर दहा लोकांपर्यंत एकत्र येण्यास परवानगी. |
२१ मे | २१ मे अखेरपर्यंत : ७०९५ केसेसची नोंद , १०१ मृत्युमुखी, २२८ पेशंट्स हॉस्पिटलमध्ये, २८ पेशंट्स व्हेंटिलेटरवर, ६४७९ रोगी बरे झाले. एकूण चाचण्या : ११,७०,६८२ |