अॅकलेशिया कार्डिया-एक जिवंत अनुभव-२
पूर्वसूत्रः - कोणीतरी परफोरेशन असे म्ह्टल्याचे ऐकू आले.
मी ज्या गोष्टीला घाबरत होतो तेच झाले होते. मी लगेच डॉक्टरांना विचारले, 'माझ्या अन्ननलिकेला भोक पडले आहे का ?' ते म्हणाले , हो पण आम्ही सर्व स्टेप्स घेतल्या आहेत. त्यासाठी त्यांनी त्या भागात एक स्टेंट घातला होता. काही नुकसान झाले नाहीये या खात्रीसाठी मला लगोलग सीटी स्कॅन करायला नेण्यात आले. वाटेत, मी बायकोला काय झाले आहे याची कल्पना दिली. नशिबाने सीटी स्कॅन चा रिपोर्ट चांगला आला. मला आता रुममधे हलवण्यात आले. हाताला सलाईन चिकटले. इंजेक्शन्सचा मारा झाला. पाठोपाठ सर्जन वर आले. त्यांनी आम्हाला सर्व समजावून सांगितले. मला तोंडावाटे आता पाणीही घ्यायचे नव्हते. गेल्या बासष्ट वर्षांत, प्रथमच मी उपास करणार होतो आणि तोही अगदी निर्जळी! पहिली रात्र ग्लानीतच गेली. डॉक्टर सकाळ,संध्याकाळ येत होते. सर्व गोष्टी मॉनिटर होत होत्या. चार दिवसांनंतर एक्स रे मधे माझा स्टेंट थोडा खाली घसरल्याचे लक्षांत आले. डॉक्टरांनी दुसरा स्टेंट बसवावा लागेल याची कल्पना दिली. तोपर्यंत आमच्या नातेवाईकांनी इतर तज्ञांशी सल्लामसलत करुन डॉक्टरांना त्यांचाशी चर्चा करायला लावली. आम्ही तर घाबरुनच गेलो होतो. पण दुसरा इलाजच नव्हता. दुसरा स्टेंट बसवताना तो पहिल्याशी इंटरलॉक करुन नीट बसवण्यात आला. आता माझ्या अन्ननलिकेत दोन डब्यांची छोटी 'मोनोरेल' झाली होती. आणखी दोन दिवस खात्री करुन नंतर मला लिक्विड डाएट वर घालणार असे ठरले. एव्हाना सगळ्यांचे फोन यायला लागले होते. मुलगी अमेरिकेतून रोज विचारपूस करत होती. मी तिला धीर देण्यासाठी मी अजिबात घाबरलो नसल्याचे सांगितले. 'स्टेंटसे स्टेंट मिला' असे गाणे तयार केल्याचे सांगून माझ्यातला 'सेन्स ऑफ ट्युमर' जागरुक असल्याची खात्री पटवून दिली.
लहान असताना आम्ही एक शन्ना नवर्यांचे एक रहस्य नाटक,अ,ब आणि क बघितले होते. त्यातील प्रत्येक अंकाच्या शेवटी अनुक्रमे, अचलाबाई अत्तरदे,बनुताई बनसोडे या ललनांचा खून होतो. तिसर्या अंकाच्या शेवटी कमलाबाई कविश्वर मरणारच असतात, पण खुनी पकडला गेल्यामुळे त्या वाचतात, असे काहीसे कथानक होते. माझी बहिणही माझ्यासारखीच विनोदी स्वभावाची आहे. त्यामुळे माझे 'बलून डायलेशन' करायचे ठरल्यावर मी तिला , अचलाबाईंना घालवायला बलूनताई बनसोडे वापरणार आहेत असे मजेने सांगितले होते. नंतर ती भेटायला आली तेंव्हा मात्र, ती गंभीर असली तरी मीच तिला माझी कमलाबाई होणार होती असे म्हणून हंसवले. असो.
तर सद्यस्थितीला मी घरी आहे पण स्टेंटस महिनाभराने काढायचे असल्यामुळे अन्ननलिकेतच आहेत. त्यांत काहीही अडकण्याचा धोका टाळण्यासाठी लिक्विड डाएट चालूच रहाणार आहे. त्यानिमित्ताने वजन घटवण्याची एक नामी संधी मला मिळाली आहे.
यापुढील भागात या रोगाविषयी विस्तृत लिहिनच. शेवटचा भाग अर्थातच माझे स्टेंटस यशस्वीरीत्या काढले गेले का नाही याबद्दल असेल. अंतिम भाग आलाच नाही तर सूज्ञास सांगणे नलगे!!!
प्रतिक्रिया
लवकर बरे व्हा! तुमच्या
लवकर बरे व्हा! तुमच्या पुढच्या भागाच्या प्रतिक्षेत आहे.
-अनामिक
तुमच्या एटीट्युडला आणि 'सेन्स
तुमच्या एटीट्युडला आणि 'सेन्स ऑफ ट्युमर'ला सलाम _/\_.
असाच एटीट्युड ठेवा आणि लवकर बरे व्हा. आम्हा सर्वांच्या शुभेच्छा आहेतच. ही लेखमाला आणि शिवाय अजूनही बरेच काही विनोदी लेख, प्रवासवर्णन वगैरे लिहायचे आहे तुम्हाला
उत्तम आरोग्य आणि आयुष्यासाठी
+१
उत्तम आरोग्य आणि आयुष्यासाठी शुभेच्छा!
अस्मिसारखंच म्हणते. काय साला
अस्मिसारखंच म्हणते. काय साला जबरी सेन्स ऑफ 'ट्यूमर' आहे! पद्मजा फाटकच्या 'हसरी किडणी'मधल्या 'मरीन लाइन्स' -> 'जगीन लाइन्स' आणि 'रोज मरे...' -> 'Rose Murrey' रूपांतरांची आठवण झाली!
लवकर बरे व्हालच तुम्ही.
-मेघना भुस्कुटे
***********
तुन्द हैं शोले, सुर्ख है आहन
_/\_
_/\_
माहिष्मती साम्राज्यं अस्माकं अजेयं
छ्या उगाच वाचला धागा! आता सतत
छ्या उगाच वाचला धागा! आता सतत एक अनामिक घोर!
असो तुम्हाला प्रणामही आणि शुभेच्छासुद्धा!
- ऋ
-------
लव्ह अॅड लेट लव्ह!
काळजी घ्या
काळजी घ्या.
लवकर बरे व्हा.
आणि ही इष्टापत्ती ठरुन तुमच्या मनासारखे सडपातळही व्हा.
sense of tumor मस्तच.
--मनोबा
.
संगति जयाच्या खेळलो मी सदाहि | हाकेस तो आता ओ देत नाही
.
memories....often the marks people leave are scars
गेट वेल सून.
गेट वेल सून.
काळजी घ्या. अन्ननलिकेशी
काळजी घ्या. अन्ननलिकेशी निगडित हा विकार पहिल्यांदाच कळला. उपचार चालू असतानाही माहिती देण्याबद्द्ल धन्यवाद.
अलिकडेच नात्यातल्या एका बर्याच वयस्कर(८२ वर्षे) आजोबांना अन्ननलिकेचा कॅन्सर डिटेक्ट झाला आणि ऑपरेशन झाले. ते आता बरे आहेत.पण लिक्विड डाएटवर रहावे लागले त्यांना काही काळ.
नक्कीच
पुढला भाग नक्कीच येणार!
प्रतीक्षेत.
शुभेच्छा
पुढला भाग येणार. वैद्यकशास्त्र प्रगत झाले आहे. तुम्ही नक्की बरे होणार.
+१
आपण नक्की बरे व्हाल. मीनव्हाईल, या सक्तीच्या विश्रांतीचा म्हणा, कठीण काळाचा म्हणा अध्यात्मिक प्रगतीकरता उपगोग करुन घ्यावा, असा एक अनाहूत सल्ला. अर्थात निर्णय आपलाच असेल.
आमच्या तीव्र शुभेच्छा आहेत.
आमच्या तीव्र शुभेच्छा आहेत.
प्रकाश घाटपांडे
http://faljyotishachikitsa.blogspot.in/
आपल्याला दीर्घायुष्य लाभो हीच
आपल्याला दीर्घायुष्य लाभो हीच इश्वराजवळ प्रार्थना!!!
लवकर बरे व्हा आणि विकाराबद्दल
लवकर बरे व्हा आणि विकाराबद्दल सविस्तर लिहा.
तुमच्या सकारात्मक भूमिकेमुळे आजाराचा तुम्हाला आणि तुमची काळजी घेणाऱ्या सगळ्यांनाच कमीत कमी त्रास होत असेल. सगळ्याच कटकटी, त्रासांकडे असंच बघता आलं पाहिजे, असं आता मी स्वतःलाच समजावते आहे.
---
सांगोवांगीच्या गोष्टी म्हणजे विदा नव्हे.
बरे होण्यासाठी आवश्यक असलेली
बरे होण्यासाठी आवश्यक असलेली गोष्ट तुमच्याकडे आहे हे लेख वाचून समजले.
आमच्या शुभेच्छा आणि प्रार्थना सोबत आहेतच.
छान लढा दिलात !
छान लढा दिलात ! लगे रहो और खुशिया बरसाओ