लपाछुपी -एक उत्क्रांती

क्रिकेटचा बॉल जेव्हाजेव्हा खिडकीला डोळा मारून जातो, सोसायटीत कुठेतरी लांब एक ज्वालामुखी जागा होतो.

मैदानावर वय ६
धड्म धूम वितळे ज्वाला -पळा पळा नाना आला
दात वाजले कडाम-कुडुम - नाना आले बस दडून

मैदानावर वय १६
लपू नको सायकलीमागे - चालवणारीत गुंतले धागे
आला आला तो बघ तो - हा तर तिच्या आईचा घो.

मैदानावर वय २६
मुतारीच्या मागे जाउ- एक दम मारून येऊ
मार साल्या अजून बाता - कपाळात गेल्यात आता.

मैदानावर वय ३६
हाण भडव्या अजून एक - आमची नुसती फेकमफेक.
कडेसरीला बसून आता - उरल्या आहेत फक्त बाता.

खिडकीमागे वय काकू
न धरी शास्त्र करी मी
करेन विळीचा- युक्तीने वापर

खिडकीमागे वय - शिरीष कणेकर
ब्रॅडमन किंवा CK इतकं - खेळत नाही कोण्णी छान
अतिपुरातन गोष्टींचा - भरलासे व्होल्सेल अभिमान

खिडकीमागे वय - द्वारकानाथ संझगिरी
सामनातुनि लेखननलिका रोजशीच ती इथे गळे
हॉटेलातही मिळत नसतो इतुका 'उपमा' इथे मिळे

कोल्ह्याची आंबट द्राक्षं जिथे बोन्साय वेलींना लटकतात, गल्लोगल्ली तेव्हा तेव्हा नकली सिंह जन्म घेतात.