खरडफळा

अबापट

द्रुपालच्या नव्या आवृत्तीत खरडफळा नसल्याने रिकामटेकड्या गप्पा मारण्याची सुविधा नाहीशी झाली.अभिव्यक्ती स्वातंत्र्याची ही गळचेपी आता मोडून काढण्यासाठी हा खरडफळा हा धागा म्हणून काढलाय!!
मंडळी , रिकामटेकड्या गप्पा मारायला या . खरडफळ्याचे गतवैभव परत आणा.
नबा यांच्याशी गप्पा झाल्या नाहीत बऱ्याच दिवसात ..

फक्त हत्ती क्षमस्व !!
बाकी सगळे या
चालक मालक मंडळी - एवढे चालवून घ्या आमचे !!

चिमणराव Thu, 26/03/2026 - 12:42

तसं नाही.
१. कारण त्या बाबाने पत्रकारांचे प्रश्न त्यांच्यावरच उलटवले हे दुसऱ्या एका विडिओमध्ये आहे. तो मी पाहिला.
२. मी अजून त्यांच्याकडे जाऊन प्रत्यक्ष भेटलो नाही पण तो जी काही औषधे देतो ती आयुर्वेदिक आहेत.
३. रुग्णाच्या डोक्यावर एक दगड ठेवून त्याचे बीपी, शुगर सांगतो. आता ती काही विद्या असेलही परंतू औषधे मात्र आयुर्वेदिकच असतात.
४. माझ्या काकांना(८०) पोटात दुखत होतं आणि लघवीचा प्रॉब्लेम झाला तेव्हा डॉक्टरांनी सांगितलं की प्रोस्टेटचं ओपरेशन करावं लागेल पण तुमचं वय आणि प्रकृती पाहून करता येत नाही. काका गेले या खापरीवाला बाबाकडे( मुंबईहून एका ठिकाणाहून इथे जाणाऱ्या रुग्णांसाठी बस जाते. तिकडे सर्वांचं निदान आणि औषधं झाल्यावर परत येते. त्या बाबाने त्यांना दोन तीन मुठी चूर्ण दिलं काढा करून प्यायला.( पैसे नाही घेतले) महिन्याने बरे झाले. ध** चूर्ण होतं.
५.मेडिकल रजिस्ट्रेशन नाही म्हणून त्यांच्यावर( प्रॅक्टिस करण्यावर) बंदी आणली. पण बाबाने नंतर दोन डॉक्टर ठेवले आणि औषधांच्या प्रिस्क्रिप्शनवर ते सही करून देऊ लागले. त्यामुळे कायदेशीर प्रश्न बाद झाला. याचबद्दल पत्रकारांनी बाबाला छेडलं होतं तेव्हा त्यांनी उत्तर दिलं " आम्हाला ( ते आदिवासी म्हणवतात) तुम्ही शाळेत जाऊन शिकू दिलं नाही आणि तुमचे औषधोपचार खर्च परवडत नाहीत. आमचे आदिवासी पूर्वज जे उपाय करत होते आमच्या लोकांसाठी तेच मी करत आहे". या उत्तराने पत्रकार गुपचूप निघून गेले.
६. त्याला निदान कसे समजते ते अनुभवांवर असेल. उपचार मात्र आयुर्वेदिक जडीबुटीचे योग्यच देतो. मंत्रतंत्र अजिबात नाही. त्यामुळे अनिसवाले काही करू शकत नाहीत.

[ सुधीर यांच्या प्रतिसादास२५_०३_२०२६] उप प्रतिसाद.

सुधीर Thu, 26/03/2026 - 20:58

आदिवासी परंपरा सांगणारे (जडीबुटीवाले) वैद्याप्रमाणे आयुर्वेदीक औषधेही देऊ शकतात, यात नवल वाटत नाही का? ("शाळेत जाऊन शिकू दिलं नाही" म्हणून आयुर्वेद हा विरोधाभास नाही का?) 

उपचार घेणारे केवळ आदिवासी असतील आणि आदिवासी पाड्यांवरच उपचार होत असतील, तर ते समजण्यासारखे आहे आणि बाबाचा युक्तिवाद एकवेळ मान्य करता आला असता. पण नाशिकसारख्या शहरात बाबाकडे येणारे लोक केवळ आदिवासी नसावेत. "चमत्काराच्या प्रचारामुळे" भुललेल्यांचा (आलेल्या अनुभवांचा तोंडी प्रचार, पण संख्याशास्त्रीय दृष्ट्या कोणतीही ठोस माहिती नसलेला) आणि आधुनिक उपचारपद्धती परवडत नसलेल्यांचा भरणा अधिक असावा, असे मला वाटते.

चिमणराव Fri, 27/03/2026 - 04:22

आयुर्वेदीक औषधे-
१.तयार औषधे देत नाही. वनस्पतींचे मूळ, फळ वगैरे.
(तयार औषधांत योग्य प्रमाणात आणि काही आयूर्वेदिक ग्रंथातील सिद्ध कृती नुसार एकत्र केलेली वनस्पतींचे अर्क चूर्ण असतात.)
२. गूण येतो म्हटल्यावर कोणीही जातो. शहरातील रुग्ण इतर वैद्यकीय पद्धतीची औषधे घेऊन उतार न पडलेले जातात.
३. >> "चमत्काराच्या प्रचारामुळे" भुललेल्यांचा (आलेल्या अनुभवांचा तोंडी प्रचार, पण संख्याशास्त्रीय दृष्ट्या कोणतीही ठोस माहिती नसलेला) आणि आधुनिक उपचारपद्धती परवडत नसलेल्यांचा भरणा अधिक असावा, असे मला वाटते.>>----
आजाराने बेजार झालेले, औषधं खाऊन थकलेले, आधुनिक उपचारपद्धतीत तपासण्या करण्यातच बरेच पैसे घालवलेले रुग्ण उपाय शोधत असतात.

सई केसकर Tue, 24/03/2026 - 19:05

आज कर्वेनगरमधून परत येत असताना एका काकांनी I love SG असा टीशर्ट घातला होता. घरी येईपर्यंत मी विचार केला की SG कोणत्या अमेरिकन राज्याचे लघुरूप आहे. सॅनफ्रॅन, सॅनहोजे, सॅन अमुक सॅन तमुक असा डोक्याला खूप ताण दिल्यावर घरी येऊन नेटवर बघितलं तर SG= Singapore.
पुढे कधी कुणाला असा टीशर्ट घातलेला कुणी दिसला तर त्रास नको.
यातलं स्टिरिओटिपिकल गृहीतक:
कर्वेनगर म्हणजे काका अमेरिकेतच गेलेले असणार!

'न'वी बाजू Tue, 24/03/2026 - 20:57

घरी येईपर्यंत मी विचार केला की SG कोणत्या अमेरिकन राज्याचे लघुरूप आहे.

तात्यांचा बस चले तो उद्या सिंगापूरसुद्धा अमेरिकेचे राज्य बनून जाईल. आहे काय नि नाही काय?

सॅनफ्रॅन, सॅनहोजे, सॅन अमुक सॅन तमुक असा डोक्याला खूप ताण दिल्यावर...

१. यांपैकी कोठलेही अमेरिकन राज्य नाही.

२. 'संतसंतिणींचा मेळावा'१ म्हणणार होतो, परंतु, उगाच काही शाळकरी पौगंडी अश्लील संकेत आठवून गेले, नि आळंदीच्या वाटेच्या आठवणींनी गहिवरून आले. (संदर्भ समजला नसल्यास सोडून द्या.)

यातलं स्टिरिओटिपिकल गृहीतक:
कर्वेनगर म्हणजे काका अमेरिकेतच गेलेले असणार!

मी सांगतो तुम्हाला, काका विशाल कोथरुडाबाहेर कोठेही गेलेले नसणार म्हणून.

आमच्या लहानपणी (जेव्हा नेहरूंच्या वंशावळीच्या दुष्ट सोशालिस्ट राजवटीचे सावट भारतावर असे, वगैरे वगैरे) किनई, पुण्यात (कोठल्या फूटपाथवर, कोण जाणे, परंतु) लालनिळेपांढरे चट्टेरीपट्टेरी टीशर्ट मिळायचे. पैकी पांढर्‍या पट्ट्यावर 'दुबई' नाहीतर 'सिंगापूर' नाहीतर 'न्यूयॉर्क' असे काहीबाही (रोमन अक्षरांतून) लिहिलेले असायचे. आमच्या वेळची शायनर मंडळी तसले टीशर्ट घालून गावभर हिंडत.

झालेच तर, लक्ष्मी रोडच्या फूटपाथवर जीनचे स्कूलबॅगवजा बॅकपॅक मिळत. त्यावर पुढच्या बाजूस 'जपान', 'ऑस्ट्रेलिया', 'ब्रिटन' असे काहीबाही लिहिलेले (आणि त्याबरोबर लिहिलेल्या देशाचा झेंडा) असले लोगो असत. (पैकी, 'ब्रिटन' असे लिहिलेल्या आवृत्तीत त्या यूनियन जॅकच्या लाल आणि निळ्या रंगांची हमखास आलटापालट झालेली असे; परंतु ते सोडून देऊ.)

शिवाय, 'मेड अ‍ॅज़ जपान:४४४' की कायसेसे लिहिलेला नाडीने तोंड आवळणार्‍या नायलॉन बॅगचाही एक प्रकार त्याच फूटपाथवर मिळे. (पैकी, 'मेड इन'ऐवजी 'मेड अ‍ॅज़'मागील भावना एक वेळ समजू शकतो, परंतु, ४४४चा सिग्निफिकन्स मला आजतागायत समजलेला नाही. चालायचेच.)

गेऽले ते दिवस!

तर सांगण्याचा मतलब, काकांच्या ग्लोबट्रॉटरगिरीची मर्यादा लक्षात आली असेलच. (लक्ष्मी रोडच्या फूटपाथवर आजकाल असल्या चिजा मिळतात की नाही, ठाऊक नाही; झालेच तर, हाँगकाँग गल्लीत हल्ली मोबाइल प्रावरणे सोडून काहीच मिळत नाही. परंतु, काकांनी घातला होता तसल्या टीशर्टास पुण्यात कोठेतरी 'औटलेट' असणारच!)

असो चालायचेच.

१ सान फ्रान्सिस्को, सान होसे, सान आंतोनियो वगैरेंमधील 'सान' बोले तो (स्पॅनिशमध्ये) 'संत', तर सांता क्लारा, सांता मोनिका, सांता बार्बरा वगैरेंमधील 'सांता' बोले तो (स्पॅनिशमध्ये) 'संतीण' (किंवा, 'स्त्री संत', if you will).

सई केसकर Wed, 25/03/2026 - 06:04

>>यांपैकी कोठलेही अमेरिकन राज्य नाही.
माय बॅड. राज्य आणि शहर असा गोंधळ झाला.

>>तात्यांचा बस चले तो उद्या सिंगापूरसुद्धा अमेरिकेचे राज्य बनून जाईल. आहे काय नि नाही काय?
तात्यांवरून आठवलं. अलीकडे काँग्रेसचे दोन प्रवक्ते: सुप्रिया श्रीनेत आणि पवन खेडा, दर दोनेक दिवसांनी युट्यूबवर पत्रकार परिषद घेतात. आता ती त्यांना तिथे का घ्यावी लागते याचं कारण उघड आहे. पण या प्रेस्कॉन मी न चुकता बघते कारण (काँग्रेसही "तसलंच" असलं तरी) आजच्या घडीची वक्तृत्वाची पातळी किती घसरली आहे ते बघता, स्वच्छ हिंदीत (हिंदीत का असेना!), राष्ट्रीय आणि आंतरराष्ट्रीय मुद्दे मांडणारं काही भारतात ऐकायला मिळतं. ज्यात हे सर्व मुद्दे भारताच्या दृष्टिकोनातून मांडलेले असतात. बघायला काय बीबीसी किंवा सीएनएन देखील बघता येतंच. पण मोदीजी त्यांच्या दृष्टीने इतके महत्वाचे नाहीत.
तर तर, परवा खेडा यांनी साहब बीबी और गुलाम हा गुरुदत्तचा सिनेमा वापरून एक प्रेस्कॉन केली. साहेब = तात्या बीबी=बीबी आणि गुलाम=ओळखा..
https://www.youtube.com/live/QdrSqkAtAcE?si=Q40lsOqrIowQkjpi

अर्थात याबद्दल मतमतांतरे असणारच. पण मुख्य प्रवाहातील मीडिया हे न दाखवून नक्कीच TRP गमावतो आहे. हल्ली मराठी वृत्तवाहिन्या एखाद्या घरातली भोचक आत्याबाई (मला इथे आत्याबाई शब्द वापरताना खूप त्रास होतो आहे कारण हे सगळं करणारे पुरुष पत्रकारच असतात) असल्यासारख्या बातम्या देतात.
एखादा राणे कुणाबद्दल तरी काहीतरी अत्यंत हीन वक्तव्य करतो. मग हे सगळे माईक घेऊन त्याच्याकडे जाऊन त्याला सांगतात (वास्तविक ते त्यानं टीव्हीवर बघितलेलं असतं!) आणि त्याला विचारतात "तुमचं याबद्दल काय म्हणणं आहे?" मग तो त्याहून हीन असं काही बोलतो की लगेच हे माईक घेऊन राणेकडे जातात. असं २४ तास करत बसणं म्हणजे बातम्या.
सुप्रिया श्रीनेत यांचं भाषण ऐकताना सुषमा स्वराज यांची आठवण होते. पण ते मोदींबद्दल वाईट बोलत नाहीत असं नाही. ते फक्त सिद्ध हिंदीत बोलतात म्हणून ते वाईट वाटत नाही. उदाहरणार्थ मोदींचे परराष्ट्र धोरण म्हणजे सगळीकडे जाऊन "खी खी खी" हसणे हे वर्णन मला फार आवडलं.
असो.
गुरुदत्तच्या सिनेमात तात्या नेतन्याहु आणि मोदींना बसवणे ही करमणूक भोचक अत्याबाईपेक्षा मला जास्त आवडते.

>>लक्ष्मी रोडच्या फूटपाथवर आजकाल असल्या चिजा मिळतात की नाही, ठाऊक नाही;
मिळतात! आम्ही लहान होतो तेव्हा सारसबागेबाहेर एका बाजूला Adidas आणि दुसऱ्या बाजूला nike यांचे लोगो असलेला एकच बूट (म्हणजे अशी जोडी) मिळायची! आता काय.मिळतं याचा सर्व्हे घ्यायला हवा या निमित्ताने. पण सध्या देशप्रेम फार बोकाळले असल्याने सगळीकडे पैठणीचे ड्रेस दिसतात. फारच डोक्यात जातात ते. खरी पैठणीसुद्धा आता नेसावीशी वाटत नाही.

प्रभुदेसाई Thu, 26/03/2026 - 13:35

मनपिशाच
ह्या सिनेमा बद्दल इथे कोणी लिहिले आहे कि नाही, मला कल्पना नाही, असेल तर पुढे वाचू नका.
राही अनिल बर्वे तुंबाड फेम ह्यांनी दिग्दर्शित मनपिशाच film बघितली. ह्या सिनेमाचे वैशिष्ट्य म्हणजे एक तास वीस मिनिटांचा सिनेमा केवळ रुपये ३३००० मध्ये बनवला आहे, अजून एक म्हणजे AI, फोटोशॉप, आफ्टर इफेक्ट चा वापर. पण ही अनिमेशन film नाहीये. सायाकॉलॉजीकल हॉरार प्रकारातील आहे, जबरदस्त वातावरण उभे केले आहे. बाकी तुम्हीच ठरवा. बघायची असेल तर ही घ्या लिंक.
https://www.youtube.com/watch?v=RjphBAgLwKo
ह्यावरून मला माझ्या एका कथेची आठवण झाली.
ती मला ऐसी च्या २०२५ दिवाळी अंकात प्रसिद्ध करायची होती. पण नंतर विचार केला नको दिवाळी अंकात ही कथा नको. आता मी इथेच लिहीन. पण त्या आधी ही film पहाच,

प्रभुदेसाई Thu, 26/03/2026 - 16:14

मनपिशाच बघितल्यावर मग पुन्हा एकदा भयकथा वाचायला घेतल्या. स्टीफन किंग चे पुस्तक वाचायला घेतले. समोर पहिलीच कथा आली ती वाचली.
स्टीफन किंग हा माझा आवडता लेखक आहे. काल रात्री जागून त्याची "1408" दीर्घकथा वाचून संपवली.
"1408" हा डॉल्फिन हॉटेल मधल्या १४व्या मजल्यावरील खोलीचा क्रमाक आहे. ह्या हॉटेलला १३वा मजला नाही. तसेच 1408 आकड्यांची बेरिज १३ येते. हे लेखक जेव्हा सांगतो तेव्हाच डोक्यात शिरते.
माईक एन्स्लीन हा कथेचा नायक व्यवसायाने लेखक आहे. त्याचे वैशिष्ट्य हे कि तो पछादलेल्या जागी एक रात्र काढायची आणि आलेल्या अनुभवांची नोंद करून मग पुस्तकरूपाने प्रकाशित करायचे. रूम "1408" ही भुताळी रूम आहे, त्या रूम मध्ये एक रात्र त्याला काढायची आहे.
पण हॉटेलचा मॅनेजर त्याला परावृत्त करायचा आटोकाट प्रयत्न करतो. त्या खोलीत गेस्टना आलेले अनुभव त्याला सांगतो, पण नायकही आता हट्टाला पेटलेला असतो. शेवटी हॉटेलच्या मॅनेजरला त्या खोलीची किल्ली त्याच्या हवाली करावी लागते.
पुढे काय होते? मूळातूनच वाचावे.
ही एक मनोवैज्ञानिक भीती कथा आहे, किंगने लिहिलेल्या "on writing" ह्या पुस्तकात "कथा कशी लिहिली जाते" त्याचे उदाहरण म्हणून ही कथा लिहिली होती.
ह्याच नावाचा कथेवर आधारित सिनेमाही तुम्ही बघू शकता. नेटफ्लिक्स वर आहे.
ही माझ्या मते भूताटकीची कथा नाही, कारण भूत म्हणजे कुणातरी माणसाचे वा प्राण्याचे असायला पाहिजे. त्या रूम मध्ये जे काही होते THE THING ते स्वयंभू अमानवीय होते.

सुधीर Thu, 26/03/2026 - 21:08

मनपिशाच फास्ट फॉर्वर्ड करून २ दिवसांपूर्वी पाहिला होता. तंत्रज्ञान कुठवर आलंय ते पहायला. चांगला वाटला. हे तंत्रज्ञान अजून पुढे गेले की, भविष्यात चित्रपट, एकंदर मनोरंजन आणि जाहिरात इंडस्ट्रीचे स्वरूपच बदलून जाईल.
१४०८ चं ट्रेलर आवडलं.

'न'वी बाजू Sat, 11/04/2026 - 04:54

"1408" हा डॉल्फिन हॉटेल मधल्या १४व्या मजल्यावरील खोलीचा क्रमाक आहे. ह्या हॉटेलला १३वा मजला नाही. तसेच 1408 आकड्यांची बेरिज १३ येते. हे लेखक जेव्हा सांगतो तेव्हाच डोक्यात शिरते.

यात विशेष ते काय सांगितलेत?

किंबहुना, अमेरिकेत १३वा मजला असलेले कुठले हॉटेलच कशाला, परंतु १३वा मजला असलेली कुठलीही इमारत (विशेषेकरून commercial इमारत) दाखवाच, म्हणतो मी. च्यायलेंज आहे आपले!

It’s not a bug; it’s a feature. And a pretty commonplace feature, at that.

(म्हणजे, हॅरी पॉटर इंग्लंडात होता, म्हणून तो हॉगवर्ट्सला जाण्याकरिता पावणेदहा क्रमांकाच्या फलाटावरून सुटणारी झुकझुकगाडी पकडीत असे. (पावणेदहा क्रमांकाच्या फलाटावर जाण्यासाठी नऊ आणि दहा क्रमांकांच्या फलाटांच्या मधील भिंतीतून आरपार जावे लागे. तर ते एक असो.) अमेरिकेत जर असता, तर त्याने बहुधा एखाद्या गगनचुंबी इमारतीतील तेराव्या मजल्यावर स्कूल अटेंड केली असती. (त्याकरिता त्याला बाराव्या आणि चौदाव्या मजल्यांच्या मधील छपरातून/फरशीतून आरपार जावे लागले असते.) असो चालायचेच.)

प्रभुदेसाई Sat, 11/04/2026 - 08:14

माहिती बद्दल आभार.
आता बहुतेक "१४०८" क्रमांकाची रूमही कुठल्याही हॉटेलमध्ये नसणार. किबहुना ज्या आकड्यांची बेरीज १३ येते अश्या क्रमांकाची रूमही नसणार! उदा ९०४!
एकूण काय तर या बाबतीत अमेरिकन आणि भारतीय पंलिकमध्ये खूप साम्य आहे असे दिसते. आन्ही पण लहानपणी तिचे मिळून कुठल्याही कामाला बाहेर जायची वेळ आली तर खिशात एक दगड ठेवत असू, का तर तीन तिघाडा काम बिघाडा.
मला वाटत कि प्रत्येक समाजात असे काही डेंजर नंबर असावेत. कुणाला काही माहिती आहे का?

सई केसकर Sat, 11/04/2026 - 19:40

आम्ही अलीकडेच नवीन घर घेतलं जे आता बांधकामाच्या स्थितीत आहे. तर आम्ही तेराव्या मजल्यावरील तिसरा फ्लॅट घेतला. ती माझ्या आजीची जन्मतारीख आहे. पण आपल्या आजीची जन्मतारीख असलेला फ्लॅट घेऊन आपण आपल्या नवऱ्याला तर दुखवणार नाही ना असा विचार करून त्याला मी १३ दिवसांचा वेळ दिला. पण तो सगळा वेळ घेऊन विचार करून एक रोमांचक आठवण तयार न करता तो लगेच १३०३ ला हो म्हणाला.
लोकांना वाटतं की तेराव्या मजल्यावर फ्लॅट घेतला म्हणजे मी एकदम अँटी अंधश्रद्धा आहे. पण मी एक आजीच्या आठवणीत रमलेली आण्टी आहे फक्त.

सई केसकर Mon, 30/03/2026 - 13:28

काल आईकडे जात असताना, रामबाग कॉलनीत एक साधारण माझ्याच वयाचा काका
अस्त
व्यस्त
मस्त
असा देवनागरीत लिहिलेले शब्द असलेला टीशर्ट घालून चालला होता.
यावरून मला पडलेले प्रश्न
कशाचा अस्त?
कशाचे प्रमाण व्यस्त?
काय मस्त?

हल्ली पुण्याच्या काही मोहल्ल्यांमध्ये असे मराठीत काहीतरी लिहिलेले कपडे घालायची पद्धत आहे. यापैकी एक
हिला विचारून सांगतो
असा टीशर्ट मला माझ्याच नवऱ्यासाठी घ्यायचा आहे.

अबापट Wed, 01/04/2026 - 15:59

इथे फारसे कुणी क्रिकेट आवडणारे असतील असे वाटत नाही. (मला आवडतं )
इथे IPL नावाचे 'नक्रिकेट' बघणारे आहेत का कुणी ? ( मी बघत नाही. बघवतनाही)

सई केसकर Wed, 01/04/2026 - 16:32

मला पोरामुळे सक्तीने बघावं लागतं. मला ट्वेन्टी ट्वेन्टी किंवा आयपीएल काहीच आवडत नाही.
पण अलीकडे पर्याय नसतो. मग आम्ही त्याला सांगतो, आमच्यावेळी क्रिकेटच्या मॅच पाच पाच दिवस चालत असत. किमान संबंध दिवस तरी.
आमच्यावेळी आगरकर नावाचा एक खेळाडू होता जो मला खूप आवडायचा. मग एक दिवस त्यानं आत्ताच्या आगरकरकडे बोट दाखवून, हा बघ आई तुझा आगरकर असे उद्गार काढले.

'न'वी बाजू Thu, 02/04/2026 - 07:01

…इथे नास्तिकांच्या मेळाव्याबद्दल तुम्ही काही विचार मांडले होतेत, ती प्रतिक्रिया काढून का घेतलीत, म्हणे? (कशी काढून घेतलीत, हा वेगळा प्रश्न.) त्यावर हातभर उत्तर लिहायला घेतले, ते सुपूर्द करेपर्यंत तुमचा मूळ प्रतिसाद गायब झाला. चालायचेच.

सई केसकर Wed, 08/04/2026 - 17:49

कुळथाचं पिठलं दोन जणांसाठी -
जिन्नस:
१. १/३ कप (अमेरिकी प्रमाण) कुळथाचं पीठ
२. ५ लसूण पाकळ्या. अर्ध्या कापून हळू ठेचायच्या. पिठल्यातून बोटानी तुकडा बाजूला काढता आला पाहिजे इतपत.
३. १-१/२ टेस्पू तेल
४. १ टीस्पू मोहरी
५. १/२ टीस्पू हळद
६. १/२ टीस्पू हिंग
७. २ सुक्या लाल मिरच्यांचे तुकडे
८. ४-१/२ कप पाणी
९. ५ आमसुलं
१०. मीठ
११. बारीक चिरलेली कोथिंबीर
१२. १-१/२ टेस्पू ओलं खोबरं

कृती:
. पिठी + १/२ कप हळूहळू पाणी. सरबरीत. गुठळ्या नको. बाजूस ठेवावे.
. तेल + मो-हिं-ह + लाल मिरच्या + लसूण फोडणी. लसूण जेमतेम परतवायचा तांबूस न होऊ देता.
. लगेच उरलेलं ४ कप पाणी (मी गरम पाणी वापरतो) + आमसोलं -> उकळी.
. + सरबरीत पिठी + मीठ -> १ उकळी.
. भातावर ओतून कालवता येईल असं, रटरटतं हवं. आमटीसारखं पातळ नव्हे. फार घट्ट वाटलं तर पाणी घालून वाढवायचं. फार पातळ वाटलं तर आटवायचं.
. वरून कोथिंबीर + ओलं खोबरं.

'न'वी बाजू Sat, 11/04/2026 - 18:41

(एआय गुरुजींचा धागा (अजून) भरकटायला नको म्हणून इथे)

मूळ पृच्छकाने (बोले तो, अबापटांनी) त्या धाग्यावर “ती पाककृती इथे द्याल काय ?” असे विचारले होते. (संदर्भ.)

तसेही, (एआयगुरुजींचा) धागा (अजून) भरकटणे हे ‘एआयसीअक्षरे’चे बग नसून फीचर नव्हे काय? बोले तो, आपल्या सर्वांचे (एआयगुरुजी इन्क्लूडेड) ते उद्दिष्ट असावयास नको काय?

(निदान माझे तरी ते आहे, हे मी कधीच लपविलेले नाही. आणि, केवळ एआयगुरुजींच्या धाग्याच्याच बाबतीत नव्हे; कोठल्याही धाग्याच्या बाबतीत. तसा मी पक्षपाती नाही.)

तर मग प्रश्न असा आहे, की हा अतिचांगुलपणा (मराठीत: चोंबडेपणा) करून तुम्ही नक्की काय मिळविलेत?

पाहा: तुम्ही उत्तर इथे दिलेत, म्हणून मूळ पृच्छकाला (पक्षी: अबापटांना) तुमचे आभार इथे (पक्षी: या धाग्यावर) मानावे लागले. हे सर्व सुखेनैव त्या धाग्यावर घडू शकले नसते काय?

(छ्याः! सगळी मजा घालविलीत!)

असो चालायचेच.

सई केसकर Sat, 11/04/2026 - 19:36

>>तसेही, (एआयगुरुजींचा) धागा (अजून) भरकटणे हे ‘एआयसीअक्षरे’चे बग नसून फीचर नव्हे काय?

हे खरेच आहे. पण कभी कभी मेरे दिल में खयाल आता है की असे धागे भरकटवणे आपल्याला मान्य असले तरी ते लिहिणाऱ्याला मान्य असेलच असे नाही. मग उगाच त्यांना वाईट वाटायला नको.

आणि खरडफळा हत्तीफळ्याच्या पुढे जावा म्हणूनही माझे प्रयत्न चालू आहेत. म्हणजे सुरुवातीला मी तिथे खूपच टाईमपास केला. पण तो इथेही चालला असता.

'न'वी बाजू Sat, 11/04/2026 - 19:45

या प्रतिसादातील मुद्द्यामुद्द्यावर प्रतिवाद करण्यासारखा आहे. परंतु, तूर्तास माझ्या हाती तेवढा वेळ नाही. सबब, सवडीने पुन्हा कधीतरी. जागा राखून ठेवतो.

आभार.

प्रभुदेसाई Sat, 11/04/2026 - 00:06

आज हे वाचनात आले,
"Idiosyncratic take on the Second Law of Thermodynamics
Kipple is useless objects. When nobody’s around, kipple reproduces itself. It always gets more and more. No one can win against kipple, except temporarily and maybe in one spot, like in my apartment. But eventually I’ll die or go away, and then the kipple will again take over. It’s a universal principle operating throughout the universe; the entire universe is moving...toward a final state of total, absolute kipple-ization."
हे जणू जगाच्या सद्यपरीस्थितीचे यथार्थ वर्णन आहे असे वाटले.

'न'वी बाजू Sat, 11/04/2026 - 19:36

When nobody’s around, kipple reproduces itself.

Sexually, or asexually?

नाही, sexual reproduction ही तशी एक प्रचंड वेळखाऊ प्रक्रिया आहे, म्हणून विचारले.१ Kippleचे अंतिम उद्दिष्ट जर साध्य व्हावयाचे असेल, तर the only way around is to go nuclear; asexual reproductionला पर्याय नाही!२

असो चालायचेच!

१ किंबहुना, sexual reproduction हे मुळात भारतातल्या वाढत्या लोकसंख्येच्या समस्येला आळा घालण्यासाठी तोडगा म्हणून सुचविण्यात आले असावे, अशी माझी धारणा आहे. भारतीय जर asexually reproduce करीत असते, तर ही समस्या आणखी किती बिकट झाली असती, याचा विचार करा!

२ शिवाय, Kipple२अ जर sexually reproduce करू लागले, तर आवाज किती होईल (आणि, पर्यायाने, ध्वनिप्रदूषण किती वाढेल), याचाही विचार अवश्य करा.२ब

२अ वाक्याच्या मधले capitalization माझे. (कितीही झाले, तरी Kipple हे विशेषनाम आहे. त्याचा योग्य तो आदर झालाच पाहिजे.)

२ब आमच्या तारुण्यात जे असंख्य “height of” jokes लोकप्रिय होते (नव्हे, ज्यांचा सुळसुळाट तथा प्रादुर्भाव झाला होता), त्यांपैकी Height of Noiseची व्याख्या अजूनही आठवते: Two skeletons making love on a tin roof.

'न'वी बाजू Mon, 13/04/2026 - 05:27

… sexual reproduction ही तशी एक प्रचंड वेळखाऊ प्रक्रिया आहे…

किंबहुना, तिची संभावना कोणी एक आत्यंतिक bureaucratic प्रक्रिया अशी केल्यास प्रत्यवाय नसावा.

(अगोदर अर्ज करा, मग महिनोन् महिने घोंगडे भिजत पडणार, नि सरतेशेवटी काम होईल, याची शाश्वती नाहीच. लाल फितीचा याहून उत्तम नमुना इतरत्र कोठे सापडावा? अगदी भारतीय (विशेषेकरून सरकारी) बँकासुद्धा या बाबतीत तिच्याशी स्पर्धा करू शकणार नाहीत.)

(त्याउलट asexual reproduction पाहा. झट् तक़सीम, पट् आबादी! एक घाव नि दोन तुकडे, मामला खतम!)

(पण लक्षात कोण घेतो?)

सई केसकर Mon, 13/04/2026 - 07:28

>>(त्याउलट asexual reproduction पाहा. झट् तक़सीम, पट् आबादी! एक घाव नि दोन तुकडे, मामला खतम!)

पण याचा अर्थ असा होतो की प्रत्येकच व्यक्ती प्रजनन करायला तयार झाली की प्रजनन होणार! मग लोकसंख्या चेन रिऍक्शनसारखी वाढली असती!

शिवाय, प्रियराधन, मग मामुली भांडणं, मध्येच एखादा अफेअरचा तेढ, प्रेमभंग, मग काहींचे लग्न, काहींचे लिव्ह इन, काहींचे लिव्हिन नंतर ब्रेकअप, काहींचे डिव्होर्स, असं सगळं वैविध्य कसं आलं असतं? मुळात पुरुष श्रेष्ठ की स्त्री असा वाद घालायला सोशल मिडियाला मिळालाच नसता.

शिवाय मेहदी हसन, गुलाम अली वगैरे लोकांना धंदे चालूच करता आले नसते.
आपलेच दोन मेहदी हसन होत असताना कुणी "आ फिर से मुझे छोड़ के जाने के लिए आ" वगैरे आळवत का बसेल?
किती कविता कॅन्सल झाल्या असत्या!
शिवाय सगळी स्पर्धाच नाहीशी झाली असती. त्यामुळे सुंदर दिसायचे काय इन्सेन्टिव्ह? मॅक, मेबिलिन, लॅक्मे वगैरे लोकांचे धंदेही बंद झाले असते.
शिवाय Durex!! भांडवलशाहीचे खूप नुकसान झाले असते.
असो

पुंबा Sun, 12/04/2026 - 10:08

धर्म म्हणजे केवळ कर्मकांडच असते. तत्वज्ञान किंवा देव यांचा धर्माशी कसलाच संबंध नसतो. यच्चयावत सगळे धर्म कर्मकांडामुळेच जगले आहेत.

'न'वी बाजू Sun, 12/04/2026 - 21:27

मुद्दा विचार करण्याजोगा आहे.

कदाचित, सगळे धर्म हे कोठले ना कोठले तत्त्वज्ञान (नावापुरते) पुढे करून त्या त्या तत्त्वज्ञानाच्या नावावर चालवलेले कल्ट आहेत, असे म्हणता येईल काय?

(येशू जातो जिवानिशी…)