ब्रेड अँड बटर - भाग ३ 'पावभाजीचा पाव'

आहा! मस्त!

भाजी बाजूला ठेऊन, पावांवर आडवा हात मारणाऱ्या माझ्या पोरीला "भाजीपण खायची" असे मोठे डोळे करून दटावताना मला हमखास हसू येते आणि हे पावभाजीचे जीवनचक्र एक पूर्ण गोल फिरून जागेवर आल्यासारखे वाटते!

हे वाचल्यावर या जन्मातली पापं या जन्मात फेडावी लागतात असं काहीतरी सुचलं! ;-)

आत्तापर्यंत आयुष्य फार सुखात जात होतं हो. चालत जाण्याच्य अंतरावर असणार्‍या दुकानात जे काही मिळतं ते आणायचं, खायचं आणि तक्रार करायची नाही अशा तत्त्वज्ञानावर मी फार सुखात होते. या रुचीच्या 'ब्रेड अँड बटर'मुळे काहीतरी पाशवी खुळं डोक्यात शिरत आहेत.

फोटो फारच आवडले.

आआह! या वीकेंडला नक्की करून पाहणार. खूप दिवसांपासनं प्रयोग करायचा विचार होता.
एकच प्रश्न - या कृतीत अंडं वगळलं तर बाकी काय बदल करावे लागतील? घरी सगळे अंडी खात नाहीत.

१. ड्राय यीस्ट असल्यास किती घ्यावं?
२. बेकिंग शीट आणि पार्चमेंट पेपरला काय पर्याय? (फार मागास भागात राहते गं मी, अ‍ॅल्युमिनिअम फॉईलही मिळत नाही इथे)

ही उत्तरे मिळाल्यास पुढच्याच आठवड्यात पा कृ करून पाहण्यात येईल.

आम्ही अजून फोकाचियाचं सहित्य जमवतोय तोच नव्या पाकृने तोंपासु :)

बाकी, आमच्या घरी ६ व्यक्ती आणि सरासरी ४ पाव धरले तर दुप्पट मेहनत करावी लागेलसं दिसतंय ;)

एक प्रश्नः किती तापमानावर पाव १५ मिनिटे भाजावा?

अरे हो.. आभार! :)

>>या कृतीत अंडं वगळलं तर बाकी काय बदल करावे लागतील?

ब्रेडच्या पिठात अंडी, दूध किंवा लोणी, तेल ह्या घटकांचा वापर दोन कारणांसाठी होतो -
१. पिठात स्निग्ध पदार्थ मिसळल्यामुळे ब्रेड हलका आणि खुसखुशीत होतो. फेटलेल्या अंड्यात हवेचे बुडबुडे असल्यामुळे ती ह्यासाठी अधिक उत्तम पडतात.
२. भाजण्याआधी वरून चोपडल्यामुळे भाजल्यानंतर पृष्ठभागाला तकाकी येते.

जर अंडं वापरायचं नसेल, तर -
१. पिठात लोणी किंवा दूध वाढवता येतं. पण त्यामुळे पिठाच्या प्रवाहीपणात फरक पडतो. त्यापेक्षा अशा वेळी मी दुधाची पावडर वापरतो. सुरुवातीला मैदा आणि मीठ एकत्र करतानाच ५०० ग्रॅम मैद्यासाठी ३-४ टेबलस्पून दुधाची पावडर वापरता येईल.
२. वरून लावण्यासाठी अंड्याला पर्याय म्हणून दूध (आणि चालत असेल तर किंचित साखर त्यात विरघळून) वापरता येईल. भाजलं जाताना दूध-साखरेचं कॅरॅमेलाइझेशन होऊन त्यामुळे तकाकी येते.

अहाहा! कसला मस्त दिसतोय हा पाव... आणि करायलाही तसा फारसा किचकट वाटत नाही. पावभाजीसोबत अमेरिकन ब्रेड स्लाईसेस खाण्यापेक्षा असा ब्रेड करायला हरकत नाही.

(एरवी कधी घरी पाव बनवण्याचा विचारही करणारी मी आजकाल दुकानातल्या बेकिंग मटेरियलच्या सेक्शनमधे यीस्ट कोणतं असावं असा ओझरती नजर टाकून अंदाज घेत असते ;))

आजच फोकाचिया बनवून पाहणार होते, तेवढ्यात हे पाव बनवण्याचे आवाहन पाहिले आणि बेत बदलला.

ही वेगवेगळ्या स्थितीतली चित्रे.

पीठ दुप्पट फुगले असताना

गोळे बनवताना किती जोर देऊन बनवायचे ते कळले नाही, हलक्या हाताने बनवल्यावर असे दिसत होते. गोळेही क्लिंग फिल्मने झाकून ठेवले होते.

मेहेनतीचे फळ

माझी भट्टी कमी उष्ण आहे, म्हणून पाव जास्त वेळ ठेवायला लागले, पुढच्या वेळी किंचीत जास्त तापमान ठेवून बघेन. कदाचीत बाहेरुन जरा जास्त नरम आणि ओलसर राहतील(केक बनवताना मी खालच्या कप्प्यात एका भांड्यात पाणी ठेवत असते, तसेही करून बघावे का?).

रुची, आपली कॄती सांगितल्याबद्द्ल आभार.

संपादकः चित्रे डकवताना height किंवा width यापैकी कोणताही एक अथवा दोन्ही पॅरामिटर्स देत नसाल तर तो पर्याय कृपया हटवावा. त्यामुळे काही ब्राऊझर्समध्ये चित्रे दिसत नाहित. या प्रतिसादात योग्य ती सुधारणा केली आहे

सानिया, गोळे बनवताना हलक्या हाताने वळायची गरज नाही, उलट ताणून-ताणून खाली ओढून त्याची खाली पुरचुंडी केल्यासारखे केले तर वरचा पृष्ठभाग चांगला गुळगुळीत आणि एकसमान बनेल, मी पुन्हा बनवेन तेव्हा एक चित्रफित काढून डकवेन. मला वाटते की तुम्ही पुढच्या वेळेस पीठ वजन करून घेतले आणि इतर सामानही काटेकोरपणे मो़जून घेतलेत तर पाव जास्त हलका होईल. तुम्ही वर्णन केल्यापेक्षा पीठ बरेच सैल बनते. भट्टी जास्त तापविली तर ब्रेड बाहेरून कडक होतो, थोड्या कमी तापमानावर जास्त वेळ भाजला तर मऊ होतो. या ब्रेडसाठी खाली थाळीत पाणी ठेवायची गरज नाही, साधारण क्रस्टी ब्रेड हवा असेल तर जास्त तापमानावर भट्टी तापवून आणि खाली पाण्याची थाळी वगैरे ठेऊन ब्रेड भाजतात.

आई ग्ग.. हा ब्रेड घरीही बनवता येऊ शकत असेल हे लक्षातच आलं नव्हतं.

परदेशांतले अनेक मित्रमैत्रिणी या पावाच्या अभावाने ग्रस्त आहेत हे ऐकून वाईट वाटलं. भारतात, निदान मुंबईत तरी पहाटे पहाटे ट्रिंग ट्रिंग सायकलची घंटी वाजवत आणि धीटपणे दाराची बेलही वाजवत झोप खराब करणार्‍या काही दुष्ट व्यक्ती हे पाव घेऊन येतात.

वॉव. मस्तच :D> पण मी काही एअवढे कश्ट घेणार नाही. त्यापेक्षा खालच्या बेकरीतून आणेन. 8)

बेकरी म्हणजे केवळ विक्रीवाली की ब्रेड बनवणारी?
बनवणारी असेल तर त्यांची वेळ साधून नुकताच बनलेला गरम पाव आणून त्यात लोणी लावून खाल्ला आहेत का?

ती बेकरी दोन्ही प्रकारची आहे. सकाळी मॉर्निग वॉकला जाताना काय खरपूस वास येतो.

आणि तो लोण्याचा पाव महिन्यातून दोनदा असतोच माझ्याकडे

एक फर्माईश** आहे: पिझ्झा बेस बनवायला शिकवाल का?
विकतच्या पिझ्झा बेसवर घरी पिझ्झा बनवतो पण तसा पिझ्झा खाण्यापेक्षा पिझ्झावाल्यांसारखा सुरवातीपासून बनवता आला तर बहार येईल

=
** (खरं तर विनंती शब्द हवा.. पण तुम्ही इतके कॉप्लेक्स ब्रेड्स बनवता तर ही विनंती कीस झाड की पत्ती आहे असे वाटल्याने फर्माईश शब्द वापरत आहे)

बेकरीतून जे ब्रेड पाव आणतो त्यासगळ्यात अंडे असते का?

>>पिझ्झा बेस बनवायला शिकवाल का?

माझ्या अनुभवानुसार कमी तापमानावर आणि कमी वेळ भाजलेला फोकाचिया हा पिझ्झा बेस म्हणून उत्तम पडतो.

>बेकरीतून जे ब्रेड पाव आणतो त्यासगळ्यात अंडे असते का?

भारतापुरतं बोलायचं झालं तर नाही. त्याचं कारण हेच की भारतात बऱ्याच लोकांना अंडं चालत नाही.

पाव मला पावला नाही, सपशेल फसला.. :( प्रत्येक गोळा तोफेत वापरता यावा इतका टणक झाला होता ;)
बहुतेक यीस्ट कमी पडले असे वाटते.

ब्यू बर्डचे अ‍ॅक्टिव्ह यीस्ट होते. दिसायला ग्रॅन्युलर दाणे दिसतात. ते अडीच टीस्पून घेतले. पूर्ण ५०० ग्रॅ मैदा घेतला होता. ब्रेड फ्लॉर म्हणून वेगळे काहि मिळाले नाहि. (बाकी इतर गोष्टींचे प्रमाण धाग्यात दिले होते अस्सेच)

पीठ भिजवतानाच पाणी कमी वाटत होते. पण धाग्यात १ कप दिल्याने तितकेच घेतले.
दोन तासात बरेच आकारमान वाढले (जवळजवळ दुप्पट असावे) पण काही विडीयोत दाखवतात तितके पीठ 'फ्लफी' झाले नव्हते..शिवाय वर दिसतेय तसे पोरसही नव्हते
गोळे करायलाही किंचित जोर लागेल इतके कठीण पीठ होते.(साधारण शंकरपाळ्यांच्या पीठाइतके किंवा त्याहुन किंचीत हलके)

काय कारण असु शकेल? पाणी कमी पडले असेल का? अजून एक म्हणजे मायक्रोवेव्हच्या कन्व्हेक्शन मोडवर १६ मिनिटे बेक केले. त्यामुळे काही असेल का? (म्हंजे OTGच हवे का?) का अधिक यीस्ट घालावे लागेल?

यीस्टच्या खोक्याचा फोटो:

आतील यीस्ट असे दिसत होते:

>>पीठ भिजवतानाच पाणी कमी वाटत होते. पण धाग्यात १ कप दिल्याने तितकेच घेतले.

वेगवेगळ्या पिठांमधलं ग्लुटेनचं प्रमाण कमीअधिक असतं. त्यामुळे असं झाल्यास (पाककृतीशी एकनिष्ठ राहण्यापेक्षा) पाणी/पीठ कमीजास्त करावं.

>दोन तासात बरेच आकारमान वाढले (जवळजवळ दुप्पट असावे) पण काही विडीयोत दाखवतात तितके पीठ 'फ्लफी' झाले नव्हते..शिवाय वर दिसतेय तसे पोरसही नव्हते

आकारमान वाढलं म्हणजे पीठ व्यवस्थित आंबलं होतं. आतल्या बुडबुड्यांविषयी फार काळजीचं कारण नाही, कारण आंबताना नाही आले तर भाजताना येतात. पण पाणी कमी पडल्यामुळे पीठ घट्ट झालं; आणि हातानं न मळल्यामुळे त्याला लवचिकता कमी आली.

>मायक्रोवेव्हच्या कन्व्हेक्शन मोडवर १६ मिनिटे बेक केले. त्यामुळे काही असेल का? (म्हंजे OTGच हवे का?)

ब्रेड वरून खरपूस भाजला गेला होता का? तसं असेल तर कन्व्हेक्शनमध्ये काही अडचण नाही. पण तसं झालं नसेल तर त्याचं कारण हे असू शकेल : काही वेळा हीटिंग काॅईल तापण्यासाठी नुसत्या कन्व्हेक्शनपेक्षा 'ग्रिल' किंवा कन्व्हेक्शन+ग्रिल किंवा 'बेक' असा पर्याय निवडावा लागतो. हे तपासायचं असेल, तर नुसते शेंगदाणे टाकून कोणत्या मोडमध्ये त्यांचा रंग बदलतो ते तपासता येईल.

>अजून एक ऑब्झरवेशनः पाव (किंवा जे काय झाले ते;) ) आतून कच्चा वाटत होता.

हे तपासण्याचा सोपा उपाय : पाव भट्टीतून काढून त्यावर (दरवाजा वाजवावा तसं) टकटक करणं. जर आतून पोकळ असल्यासारखा आवाज आला, तर ब्रेड भाजला गेला आहे. जर आतून ओलसर आणि कच्चा असेल तर भरीव आवाज येतो.

>मी भिजवलेल्या पीठाला तशी अंगभुत जाळी दिसत नव्हती. तेव्हा अजून अर्धा टीस्पून यीस्ट घातले तर फायदा होईल असे वाटते का?

अधिक यीस्टची गरज मला तरी भासत नाही. गोळा जवळजवळ दुप्पट झाला म्हणजे यीस्ट योग्य होतं. एखादवेळेस यीस्ट कमी पडलं असेल तरीही थोडा अधिक वेळ आंबवून गोळा दुप्पट करता येतो. जाळी न येण्याचं कारण पाणी आणि मळणं हे आहे.

>तृटी१: मी ज्या कपातून पाणी घेतले ते पाणी मोजले, जे साधारण २२५मिली भरले

पाणी कमी पडलं हे निदान बरोबर दिसतंय.

>तृटी२: शिवाय भारतात मिळणारी अंडी आकाराने लहान असतात हे ही मी लक्षात घ्यायला हवे होते.

अर्धा किलो पिठाला ह्यानं फारसा फरक पडणार नाही.

>बाकी हाताने मळायचे म्हंजे बायकोला इन्व्हॉल्व्ह करायला लागेल

का? हातानं पीठ मळणं फार अवघड नाही. मातीत खेळल्यासारखं चिवडत राहा. एखाद्या बोथट उलथण्यानं अधूनमधून चिकट हाताची कणीक खरवडून काढा.

एकंदर निष्कर्ष : पाणी कमी पडलं.

टणक ब्रेड टाळण्याचे आणखी काही उपाय -
ब्रेड भाजताना आत एका छोट्या वाटीत पाणी ठेवायचं. ह्यामुळे आतलं वातावरण आर्द्र राहतं.
ब्रेड भाजून झाल्याझाल्या त्यातून खूप आर्द्रता बाहेर पडते. टणक झाला आहे असं वाटलं तर ओव्हनमधून बाहेर काढल्याकाढल्या फाॉईलमध्ये गुंडाळला तर ती आर्द्रता टिकून राहते.

मी काय म्हणते सरळ आणा की बेकरीतून पाव
हाय काय नाय काय

काल पुन्हा पाव बनवून पाहिले आणि यावेळी चित्रफीत बनवायचा प्रयत्नही केला. (फाईल छोटी करायची असल्याने, चित्रफीतीचा दर्जा फार चांगला नाहीय पण साधारणपणे पीठाची घनता, मळायची पद्धत वगैरेचा अंदाज येईल.) यावेळेस माझ्या लक्षात आलेल्या काही गोष्टी:
१) पाण्याच्या प्रमाणात अगदी २५ मिलीचा जरी फरक पडला तरी कणकेच्या घट्टपणात मोठा फरक पडतो त्यामुळे सर्व साहित्य व्यवस्थित मोजून घ्यावे.
२) ५०० ग्रॅम मैदा माझ्या मोजायच्या कपाने साधारण साडेतीन कप भरला.
३) कणीक एकत्रित गोळा बनून आल्यावर, सपाट पॄष्ठभागावर सात ते आठ मिनिटे मळावी लागली.
४) कणीक आंबवायला ठेवताना थोड्या ऊबदार जागी ठेवल्यावर दीड तासात हवे तशी फुगली पण प्रादेशीक तापमानाप्रमाणे (विशेषतः थंडीच्या दिवसात) हा वेळ बराच बदलू शकतो. कणीक चांगली फुगावी म्हणून यीस्टचे प्रमाण वाढविण्याऐवजी पीठ ऊबदार जागी ठेऊन त्याला फुगायला अधिक वेळ दिल्यास ती चांगली हलकी होईल आणि पावही हलका होईल.
५) पहिल्यांदा फुगल्यावर त्याचे गोळे करून ते पुन्हा फुगण्यासाठी ठेवताना झाकले नाहीत तर अधिक उत्तम. मी चित्रफीतीत ते ओल्या फडक्याने झाकताना दाखविले आहेत पण नंतर मी ते फडके काढून टाकले आणि त्यामुळे (ते फडक्याला न चिकटल्याने)गोळ्यांचा आकार चांगला गोल राहिला.
६) यावेळेस भाजताना, पंधरा मिनिटांनंतरही पाव पुरेसे तपकीरी झाले नाहीत म्हणून अजून दोन मिनिटे ओव्हनमध्ये ठेवले. मागच्या वेळेपेक्षा यावेळेस पीठ थोडे अधिक आंबल्याने व फुगल्याने थोडा अधिक वेळ भाजावे लागले असे वाटते. त्यामुळे आपापल्या ओव्हनच्या गरमपणाच्या अंदाजाप्रमाणे भाजण्याचा वेळ ठरवावा. चिंतातूर जंतूंनी सांगितलेली पावावर टिचकी मारून त्याच्या आतून पोकळपणाच्या अंदाज बांधण्याची युक्ती चांगली आहे पण या पावाच्या लुसलुशीत बाह्यपृष्ठभागासाठी ती वापरता येत नाही. त्यामुळे पावाच्या रंगावरून अंदाज बांधावा लागेल, फार तपकीरी रंगावर गेला तर कडक होईल आणि जास्त पांढरा राहिला तर आतून कच्चा राहील.

पहिल्यांदाच पाव बनवणार्यांनी आधी मैद्याचा पाव बनवून पहावा असं मला वाटतं कारण त्यातलं ग्लूटनचं प्रमाण मुबलक असल्याने पाव चांगला बनण्याची शाश्वत्ती असते. नंतर हात बसला आणि अंदाज आला की वेगवेगळी पीठे मिसळून प्रयोग करता येतात, मी राय, स्पेल्ट, कणीक वगैरे वापरून पाव बनविले आहेत पण ते चांगले हलके बनायचे असतील तर त्यात मैदा मिसळावाच लागतो. मला स्पेल्ट आणि राय वापरून बनवलेले पाव आवडतात. शिवाय पाव बनवताना नैसर्गिक पद्धतीने वाढवलेले यीस्ट (सावरडो) वापरूनही छान चव येते पण हे सगळं बरंच वेळखाऊ आणि अनुभवाचं काम आहे, इतरांना उत्साह असेल तर पुढचे ग्रूप प्रोजे़क्ट (याला मराठीत काय म्हणायचं?) त्यावर करता येतील.
माझ्याकडच्या सुर्यांचा संच, नवर्याने लग्नाच्या पहिल्या वाढदिवसाला दिला होता :-)(काय पण धाडसी माणूस आहे नाही! ;-)) अजूनही छान चालला आहे (नवरा आणि सुराही)

>>पावासाठी मैद्याऐवजी कणीक किंवा अन्य पीठं वापरता येतील का?

बाजरी आणि नाचणीमध्ये ग्लूटेन फार कमी असतं त्यामुळे त्यांचे पाव हलके होत नाहीत. भरड दळलेली कणीक किंवा रायसारख्या धान्यांना ग्लूटेन कमी, पण चिकटपणा असतो. त्यामुळे त्यांचे पाव करता येतात, पण ते हलके होत नाहीत. बाजारातल्या फुसफुशीत ब्रेडपेक्षा पंपरनिकेल वगैरे जड ब्रेड आवडत असतील, तर असे पाव करावेत. मी अनेकदा रायचा सावरडो किंवा गव्हाच्या भरड पिठाचा मसालेदार गोड ब्रेड करतो. ही पाककृती पाहा, म्हणजे पिठाच्या गोळ्याचा पोत किती वेगळा असतो ते लक्षात येईल.

पावासाठी मैद्याऐवजी कणीक किंवा अन्य पीठं वापरता येतील का?

नाचणी आणि सोयाबीन यांची पिठे घालून पाव करून बघण्याचा विचार आहे. रोजच्या फुलक्यांमधेसुद्धा ही पिठे थोड्या प्रमाणात मिसळत असते. केक करतानाही मी थोड्या हलकेपणासाठी मैदा, कणीक, नाचणी(थोड्या प्रमाणात..याने केक बराच जड होतो) आणि सोयाबीन घालते.

तांदळाच्या भाकर्‍या करताना उकड काढते. इतर भाकर्‍यांचे पीठ भिजवताना त्यात सुरुवातीला गरम आधणाचे पाणी घालते. पीठ जुने असेल, तर त्यात थोडी कणीक चिकटपणाकरता मिसळली, तर भाकर्‍या बर्‍या होतात. पीठ खुपच जुने असेल, तर ते मी थालिपीठ करताना थोडे थोडे वापरून टाकते.

काही दिवस एका खेडेगावात राहण्याचा योग आला. तिथे राहून भाकरी करण्याची नवीन पद्धत शिकले. पिठाचा गोळा बनवल्यानंतर दोन्ही हात पिठात बुडवून घेऊन, एका हातात गोळा धरायचा आणि दुसर्‍या हाताने टाळी वाजवायची. मग दोन्ही हात विलग करून परत गोळा खाली पडायच्या आत टाळी वाजवायची. असे करत आता मी जवळजवळ अर्ध्यापर्यंत भाकरी थापू शकते. उरलेली मग पोळपाटावर थापते.

रुची, आता एकदा लोणी घालून पाव बनवून बघेन.

मैद्याखेरीज वेगळ्या पीठांचे पाव बनवायचे हा थोडा आदर्शवाद वाटतो कारण पाव हलका बनायचा असेल तर त्यात मैदा मिसळण्याची तडजोड करावीच लागते. इतर पीठे मिसळता येतात पण त्याच्यातल्या ग्लूटनच्या प्रमाणाप्रमाणे ते कीती वापरायचं यावर मर्यादा येतात. उदाहरणार्थ राजगिरा (अ‍ॅमरंथ) पीठ वापरून करायच्या पावात बरेचदा राजगिर्याच्या पीठाचं प्रमाण ३० टक्क्यांपेक्षाही कमी असतं. या धान्न्यांनी पावाला चांगली चव येते हे खरंच आहे पण फक्त प्रकॄतीस अधिक चांगला वगैरे या कारणासाठी इतर पीठे वापरायची असल्यास अधिक विचार ़करावा. मैद्याच्याच पावात थोडा गव्हाचा कोंडा (व्हीटजर्म) किंवा एकतृतियांश होल व्हीट फ्लार किंवा कणिक वापरूनही चांगला पाव बनू शकतो. मैदाही न ब्लीच केलेला वगैरे वापरून किंवा पाव बनवताना त्यात, जवस, तीळ, खसखस, भोपळ्याच्या बिया, सूर्यफूलाच्या बिया वगैरे जिन्नस घालून त्याची चवही वाढते आणि तो प्रकृतीलाही चांगला असतो. मुळात घरी कोणतेही रासायनिक पदार्थ न घालता बनवलेला ताजा मैद्याचा पावही बाजारातल्या पावापेक्षा अनेक पटींनी सरस आहे.
या धाग्याला मिळालेला प्रतिसाद पाहून पुढे अधिक क्लिष्ट, वेळखाऊ आणि चविष्ट पाव बनवायचे उपक्रम एकत्र करता येतील अशी आशा वाटते. माझे सावरडो स्टार्टर बनवायला घातले आहे, एक आठवड्यात तयार होईल, पुढे त्याविषयी लिहेनच.

फायनली! ढँटॅढॅण!!!

रुची यांनी विडीयो टाकून मदत केल्याने बराच फायदा झाला. एक म्हणजे आळस झटकून काल घरी केल्यावर रात्री उत्साहाने पाव बनवायला घेतला आणि विडीयो बघितल्याने पीठ किती मळाआयला पाहिजे, किती फुगायला हवे वगैरे प्रश्न पडत नव्हते. पीठ होऊन फुगेपर्यंत मध्यरात्र उजाडली, पण 'देवा मला पाव!' ही प्रार्थना देवानी ऐकली आणि केलेला'पाव' बर्‍यापैकी सक्सेसफुल झाला. :) अगदी रुची करतात तितका 'सुंदर' आणि फ्लफी नसला तरी आमच्याजवळ दोन पाववाले आहेत, त्यातील मला न आवडणारा पाव आहे त्यापेक्षा चांगला झाला होता ;) अधिक प्रॅक्टिसने अधिक चांगला होईल अशी खात्री वाटतेय.

-- पाव आता बर्‍यापैकी फ्लफी असला तरी मी बनवलेल्या पावाचे कव्हर जरा कुरकुरीत झाले आहे. बहुदा अंड्याचा वॉश अधिक नीट + ब्रशने द्यायला पाहिजे (त्यासाठी एक तसा ब्रश आणायला हवा)
-- मायक्रोवेवमध्ये भाजताना जरा अधिक प्रयोग करावे लागतील असे दिसतेय. कारण कॉईल आणि ब्रेडमधील अंतर अधिक असते. मी पहिले चार ब्रेड ट्रेमध्ये ठेऊन भाजले जे भाजायला जवळजवळ २० मिनिटे लागली आणि तरी आतून किंचित ओलसरपणा / दडसपणा वाटत होता. म्हणून मग पुढील चार ब्रेडसाठी ग्रिलच्या जाळीवर ट्रे ठवला आणि बेक केले तर बरोबर १५ मिनिटे लागली मात्र कव्हर कुरकुरीत झाले. बरीच रात्र झाल्याने अधिक प्रयोग न करता उरलेले चार तसेच भाजले.
-- अजून एक फरक असा की मायक्रोवेव्हमध्ये OTG च्या विपरीत पाव गोल फिरतो त्यामुळे किती फरक पडतो ते सांगणे कठीण आहे पण एकूणच हे तंत्र जमले की पाव अधिक चांगला बनेल असे वाटते.

बाकी गार झाल्यावर पाव आतून किंचित दडस वाटत असेल तर परत बेक करावा काय?

सुरवातीला उत्साहात दोन स्टेपचे फोटो काढले. आणि अजून एक आहे तो तयार पावाचा. बाकी फोटोग्राफी सकाळी करु म्हणून झोपलो. सकाळी उठल्यावर तो ऑमलेट बरोबर दिमाखात प्लेटमध्ये विराजमान होता त्या आनंदात खाऊन टाकल्याने त्याचे फोटो नाहित :)

काल संध्याकाळी एकदाचा प्रयोग करायला वेळ मिळाला. कणीक छान मळली, पण फुगायला खूप वेळ लागला; इथे प्रचंड थंडीची लाट आहे आणि भांडं शालीत गुरफटून ठेवलं तरी रात्रभर ठेवावी लागली. पहाटे उठून पावाचे आकार करून पुन्हा फुगवले. भाजायला १५ मिनिटांपेक्षा जास्त वेळ लागला. म्हणजे वरून खरपूस रंग यायला वेळ लागला, पण नंतर मागचे काही पाव वरून जास्त कडक वाटले. हा बॅलन्स बरोबर जमायला अधिक सराव हवा. आणि माझा ओव्हन थोडा विचित्रच आहे.

पाव मस्त झालाय! लोणी-जॅम लावून नाश्त्याला गरमागरम खाल्ला.

आत्ता कणीक भिजवून फुगण्याची वाट पहाते आहे.

दोन तासांमधे कणकेच्या आकारमानात दृष्य फरक नाहीये. डोशाचं पीठ काल रात्रीपासून होतं तिथेच बसून आहे. बाहेर झकास हवा आहे, टीशर्ट-शॉर्ट्सवर बाहेर पडता येईल असं. (उत्तरेकडे रहाणारे माझे स्नेही याची दखल घेतील का?) त्यामुळे वेगळं हीटींग करायची आवश्यकता नाहीये. ते करायला लागलं असतं तर गरम हवेच्या झोताखाली पीठं ठेवता आली असती. अजून अर्ध्या तासात फार फरक नसेल तर वर रुचीच्या प्रतिसादातली ओव्हन गरम करण्याची पद्धत दोन्ही पीठांसाठी वापरण्याचा विचार आहे. डोश्याचा पीठावर ही पद्धत हुकमी चालते हे अनुभवातून माहित्ये.

अजून एक. मी जे ब्रेड फ्लार आणलं ते थोडं तपकिरी रंगाचं आहे. कणीक मळताना हाताला मैद्यापेक्षा कोंडामिश्रीत कणकेसारखंच लागत होतं. म्हणून भिजवताना त्यात पाणी आणि बटर अधिक घातलं.

रुची, पाव चवीला आणि कन्सिस्टंसीला उत्तम झाला आहे. चुकून आणलेल्या आख्ख्या गव्हाच्या पीठाच्या पावाची कन्सिस्टंसी मला आवडेल अशी झालेली आहे. पाव किंचित क्रस्टी आहे आणि फुसफुशीतही नाही.
हे पीठ

ही गुरूदक्षिणा:

पाव तुला आवडण्यासारखा झालाय हे जास्त महत्वाचं :-) तुझा पूर्ण गव्हाच्या पीठाचा पाव बनवायचा उपक्रम पाहून मलाही आज तो प्रयोग करायची हुक्की आली, सुदैवाने घरात ते पीठही होते. दूध, अंडी, लोणी, पाणी या सगळ्याच्या प्रमाणात बरेच बदल करायला लागले पण पाव उत्तम झाला. त्यानिमित्ताने असेही पाव छान होतात हे कळले त्याबद्दल धन्यवाद! :-)
अधिक फोटो आणि कृती दुसर्या धाग्यात लावायचा विचार आहे.

हा माझा प्रयोग.
पाणी थोडं अधिक लागलं. अवनमधे खाली पाण्याचं भांडं ठेवलं, वेळ थोडा कमी पुरला, आणि बाहेर काढल्यावर फॉईलने झाकून ठेवल्याने मऊ झाला. पुढच्या वेळी अधिक प्रमाणात करून पहायला हवेत. अतिशय आवडली आहे रेसिपी. धन्यवाद!
फोटो दिसत नाहीये काही कारणाने :(