कवी विरुद्ध कविता
स्वस्थता नाही जिवाला, षोक ठरला जीवघेणा
सोडुनी कवितेस सार्या संपवाव्या शब्दवेणा ||धृ||
सर्जनाने होत होतो वर्णनापल्याड पुलकित
होत गात्रे तृप्त अन् सौदामिनीने देह उर्जित
सौख्य निमिषार्धात सरते, रिक्तता सरता सरेना ||१||
का असा छळवाद माझा मांडला आहेस, कविते?
दंश हा कसला तुझा, ज्याने विषाची झिंग येते?
पोखरे तनमन तरीही हे व्यसन सुटता सुटेना ||२||
मी किती घासू-पुसू, आकार देऊ कल्पनांना,
खेळवू दररोज ह्या न्हात्या-धुत्या पद्यांगनांना?
यापुढे उठणार नाही बाव्हळ्यांना काव्यमेणा ||३||
यापुढे, कविते, तुला शृंगारणे जमणार नाही
चंचले, दुसरा कवी बघ; मी तुला पुरणार नाही
मान्य, तू चिरयौवना, पण काळ माझ्याने अडेना ||४||
प्रतिक्रिया
ऐसीअक्षरेवर स्वागत!
वा! सुंदर रचना.. बरेच दिवसांनी वृतबद्ध-छंदबद्ध कविता वाचली..
आणि हो! ऐसीअक्षरेवर स्वागत!
येत रहा लिहित रहा!
- ऋ
-------
लव्ह अॅड लेट लव्ह!
ऐसी अक्षरेवर स्वागत. छंदबद्ध
ऐसी अक्षरेवर स्वागत.
छंदबद्ध आणि काहीशा जुन्या वळणाची कविता.... (जुन्या म्हणजे जुनाट या अर्थाने नव्हे) वृत्ताला साजेसे शब्दप्रयोग आहेत.
ओह आनंदकंद वृत्त होय!! तरीच
ओह आनंदकंद वृत्त होय!! तरीच म्हटले वृत्त कळेना छान कविता.
माहिष्मती साम्राज्यं अस्माकं अजेयं
कसे?
'आनंदकंद' कशाने?
हे (जे कोणते असेल ते) 'गालगागा गालगागा गालगागा गालगागा' छापाचे वृत्त आहे.
'आनंदकंद' हे, माझ्या समजुतीप्रमाणे, 'गागालगालगागा गागालगालगागा' छापाचे असते.
(चूभूद्याघ्या).
तुम्चे म्हण्णे बरोबर आहे, पण
तुम्चे म्हण्णे बरोबर आहे, पण आनंदकंद हे निव्वळ अक्षरगणवृत्त आहे का याबद्दल मला थोडा अज्ञानजन्य संदेह आहे , शिवाय ही कविता त्या चालीत म्हणायला तादृश अडचण येत नै, म्हणून म्हणालो.
माहिष्मती साम्राज्यं अस्माकं अजेयं
मस्तय कविता. आवडली. हा
मस्तय कविता. आवडली.
हा योगायोग की काही विशिष्ट योजना ठाऊक नाही, पण सगळ्या कडव्यांतली दुसरी ओळ विशेष आवडली.
-मेघना भुस्कुटे
***********
तुन्द हैं शोले, सुर्ख है आहन
आवडली. मस्तच.
आवडली. मस्तच.