अलीकडे काय पाहिलंत? - ३१

एडवर्ड नॉर्टन काय भारी आहे राव! >> एकच चित्रपट पाहिला आहे त्याचा. Red Dragon. दोघे (एडवर्ड आणि चित्रपट) आवडले. आणि वोल्डीतर आपल्याला आधीपासूनच आवडतो :D

===
विकांताला Eyes wide shut पाहिला. आवडला. असे संथ चित्रपट आवडतात बहुतेक मला (कळतात कितपत माहित नाही ;)). Blow up देखील आवडला होता.

आता हि लिंक आणि त्यातले प्रतिसादपण वाचतेय. Spoilers आहेत https://vigilantcitizen.com/moviesandtv/the-hidden-and-not-so-hidden-me…

समाजवाद आणि नंतर
Cuba - nostalgia and change | DW Documentary
42:26
Link:https://youtube.com/watch?v=zA6TWnquOYo

सध्या मी नेटफ्लिक्सवर 'द राउंड प्लॅनेट' ही बीबीसीची सीरीज बघतो आहे. सिनेमॅटोग्राफी, निसर्ग, प्राणी वगैरे सगळं छानच आहे. पण त्या सगळ्याला खाऊन टाकते ती म्हणजे कॉमेंट्री. निसर्गपटांना अगदी ठाशीव कंटाळवाणी कॉमेंट्री असते. तोच तो संथ माहितीपूर्ण आवाज, तेच ते नवेनवे फॅक्ट्स, त्याच त्या भक्ष्य-भक्षकांच्या, आई-पोरांच्या गोष्टी, आणि मानव कसा निसर्गाचा नायनाट करतो आहे टाइप मल्लिनाथ्या (पूर्वी खूप अंगावर येतील अशा असायच्या, आजकाल ते थोडं कमी झालेलं आहे.)

राउंड प्लॅनेटला चक्क विनोदी कॉमेंट्री आहे. विनोदी म्हणजे सातमजली, खो खो हसू नाही. तर खास ब्रिटिश कोरडा आणि कधीकधी काळा होणारा विनोद. अत्यंत मनोरंजक. नेटफ्लिक्स असेल तर फक्त पाच मिनिटं पाहा, नाही तुम्हाला चटक लागली तर मिशी उतरवून देईन.

मिशी उतरवू नका. आमच्या dwtv च्या चित्रफिती आणि कॅामेंन्ट्रीज पाल्हाळीक नसतातच. सूचक विनोदी आणि उपहास असतो. छोटीछोटी वाक्ये आणि मध्ये अंतर.
इजिप्त,ट्युनिशिया आणि टुर्कस्तानच्या पर्यटनाविषयी
The impact of terrorism on tourism | DW Documentary
42:26
Link:https://youtube.com/watch?v=fyYo6quHZss
हीसुद्धा छान आहे.

अ लिटल डेथ - अ क्युट मुव्ही, अबाऊट सेक्स.
सिनेमा छःआन आहे. वेगळाच आहे.

आबा, मर्डर ऑन द ओरिएंट एक्स्प्रेस पाहिला का? मला आवडला. प्वायरो मस्तं आहे.

प्वायरो मस्तं आहे.
सहमत, पण त्याच्या मिशा, जुन्या पॉयरो सारख्या टोकदार नाहीत, त्यामुळे जरा चुकल्या-चुकल्यासारखे वाटले.

नाही, पण पिल्याण आहे लौकरच पाहायचा.

विकांताला अवतार बघितला. बरा आहे.

कोको पाहिला. नितांतसुंदर चित्रपट. अतिशय गोळीबंद कथा, जबरदस्त ग्राफिक्स. म्युझिकल या प्रकारात मोडला जातो की नाही कल्पना नाही पण खुप सुंदर गाणी आहेत या चित्रपटात. मेक्सिकन लोकपरंपरा, श्रद्धा- अंधश्रद्धा, तिथली लोकगीतं यांचा कसला परिणामकारक वापर केलाय कथेत. आणि यातली कोको कसली गोड आहे! तिला आणि नायकाला आवाज देणाऱ्यांचे विशेष कौतुक. मी पाहिलेल्या ॲनिमेशन चित्रपटातला सर्वश्रेष्ठ आहे हा. विस्मरण- मरण,आपली परकी माणसं, त्यांच्या अपेक्षा, ध्येय आणि जबाबदाऱ्या यांतील द्वंद्व या सर्वांवर अतिशय गोड पद्धतीने भाष्य करणारा चित्रपट लहानग्यांना नक्की दाखवा. विशेषकरून त्यांच्या आजी- आजोबांबरोबर पाह्यला चित्रपट तर अधिक चांङले होईल.
रडगाणं: आपल्याकडे हे असले कधी होणार? नक्की काय कमी आहे आपल्याकडे? लोककथा नाहीत, संगीतकार नाहीत? पैसा नाही? तंत्र नाही? नक्की काय चुकतंय आपलं?

.

बराच काळ पेंडिंग राहिलेला 'कोर्ट' हा चित्रपट netflix वर पाहिला आणि अतिशय आवडला. खरं तर या चित्रपटाबद्दल कंटाळवाणा, कॅमेरा अजिबात हलत नाही , ameature दिग्दर्शन असे अनेक आरोप ऐकले होते. खरं तर त्यामुळेच पाहिला नव्हता. पण पाहताना दिग्दर्शन खूप आवडलं. गोष्ट साधी आहे पण दिग्दर्शनामुळे अतिशय फरक पडतो. कॅमेरा स्थिर ठेवणे ही मुद्दाम केलेली गोष्ट आहे कारण त्यामुळे दृश्यात एक आवश्यक तटस्थता आली आहे. प्रत्येक सीन मुख्य घटनेच्या आधी चालू झाला आहे आणि घटना घडून गेल्यावर काही मिनिटे तसाच ठेवून मग बदलला आहे. यातूनही त्या त्या जागेची परिस्थिती अचूकपणे दिसते. हा कोर्टरूम ड्रामा नाही तर समाजावर केलेले भाष्य आहे जे उत्तम आहे . फक्त काही सीन मध्ये अतिरेक वाटतो. म्हणजे समजलं पुढे चला वगैरे. अनावश्यक रिपीटेशन खूप आहे. कोर्टात्ल्या लोकांना खाजगी आयुष्य असू नये का त्यांनी सतत केसचाच विचार करत राहावा का असं ही वाटतं. पण एकंदरीत चित्रपट आवडला.

आत्ताच घरी दोन मुस्लिम महिला बुरख्यात आल्या. हळदीकुंकू- करंडा घेऊन. उद्या त्यांच्या घरच्या लग्नाची जाति पूजा आहे त्याचं निमंत्रण दिलंय.

अगाथा नाही जमत. युट्यबवर आहे ओरिएंट. त्याकाळी त्या कादंबय्रा वाचल्या जात असाव्यात दूरच्या प्रवासात,थंडीत घरात वेळ घालवण्यासाठी. लाकडं तरी किती फोडणार?

लोणावळा,वाई इथे आहेत हे मुसलमान. हिंदू इस्लाम दोन्ही थोडेथोडे चालीरिती मिसळ.

द गुड वाईफ पाहून संपवली... शेवट चे काही एपिसोड फार पळवल्यासारखी वाटली.
मेंटालिस्ट पाहतेय.. सिझन १ एपिसोड ७...
आता, गुन्हेगार कोण याचा विचार प्लॉट उघडला की आधीच करायला सुरू होते... मज्जा येतीये

याच सदरात रेको वाचून पाहू लागलो आणि टोटली खिळवून ठेवले आहे या मालिकेने. आता सहाव्या सीझन चे शेवटचे भाग बघत आहे. ते "सेव्हियर्स" बरोबर पहिल्यांदा झटापट होते तेव्हाचे.

ही सिरीज तिसऱ्यांदा पाहून संपवली. दिड वर्षांतून एकदातरी पाहणं होतंच.

लेयर केक नावाचा सिनेमा पाहिला. डॅनियल क्रेग आणि इतर सहकलाकारांनी मस्त काम केले आहे. कितीही आपटलीत तरी तुमची मारली जाणार असेल तर तुम्ही वाचू शकत नाही असा मौलिक संदेश हा सिनेमा देतो.

शिवाय 'कोलॅटरल ब्यूटी' नावाचा अत्यंत भिकार सिनेमा पाहिला. विल स्मिथ, एडवर्ड नॉर्टन, केट विन्स्लेट, कीअरा नाईटली, हेलन मिरेन इ. सर्वांना वाया घालवलंय. शेवटपर्यंत कळत नाही की लोकांचा नक्की प्रॉबलेम काय आहे.

कोणार्क सूर्य मंदिर ( कोनारक सूर मोन्दिरं) पाहिलं. मजेदार मिथुनशिल्पं आणि गाइड लोकांची या शिल्पांचं स्पष्टिकरण देण्याची व्यर्थ खटपट ऐकली. खजुराहोच्या शिल्पांशी तुलना केली तर तिथल्या युवकयुवतींचे चेहरे छापांतून काढल्यासारखे प्लास्टिक वाटतात ( तिथे गेलो नाही पण फोटोंतून वाटतय.) कोनार्कच्या शिल्पांत आनंदी भाव आहे. उरकणे नाही. जैनमुनिसुद्धा कोरले आहेत.

हुलू वर बर्न नोटिस वाल्या जेफरी डोनोव्हन चा मुख्य रोल असलेली 'शट आय' नावाची सिरीयल आहे. काल पहिले २-३ भाग बघितले. एंगेजिंग वाटते.

आण्टुराज (Entourage) बघताना टोटल बदाम गॉगल लावून पाहिलेली त्यातली "स्लोन" यात आहे. आता तितकी छान नाही दिसत, पण आवडेबल दिसते. इमॅन्युएल चिरीकी का काहीतरी उच्चार असावा नावाचा.

बाकी आण्टुराज शब्द पुलंनी "फ्रेण्डीन्नीड इजे फ्रेण्डीण्डीड" बद्दल लिहीले होते ("वाक्य इंग्रजी आहे पण मराठीतून लिहील्याने कन्नड वाटते") तसे आहे थोडे - शब्द इंग्रजी आहे पण मराठीतून लिहील्याने तेलुगु चित्रपटाचे नाव वाटते.

'द गर्ल विथ अ ड्रॅगन टॅटू' हा वगळता त्या मालिकेतले इतर दोन सिनेमे बघितले, 'द गर्ल हू प्लेड विथ फायर' आणि 'द गर्ल हू किक्ड हॉर्नेट्स नेस्ट'. लवकरच पहिला चित्रपटही बघेन.

चित्रपटाची थीम अशी की लिस्बेथ सालांडर नावाच्या मुलीला आणि तिच्या आईला लहानपणी तिच्या बापानं फार छळलं आहे. व्यवस्थेनं तिच्या तक्रारींकडे दुर्लक्ष केलं आहे. बारा वर्षांची असताना लिस्बेथनं बापाच्या तोंडावर पेट्रोल ओतून, काडी लावून दिली. तेव्हापासून तिची परवड आणखी वाढली.

तिचा बाप सोव्हिएत रशियातून पळून आलेला माजी हेर आहे. त्यामुळे यंत्रणा त्याला हात लावायला तयार नाही. तो यंत्रणेचा पुरेपूर गैरफायदा उठवतो आणि त्याला साथ देणारे स्विडीश अधिकारी आहेत. हे सगळे मिळून लिस्बेथच्या तक्रारींकडे लक्ष दिलं तर तिचा बाप आणि हे स्विडीश अधिकारी उघडे पडतील म्हणून तिला हरप्रकारे अडकवण्याचा प्रयत्न हे लोक करतात.

लिस्बेथ आणि तिला मदत करणारा पत्रकार मिकेल ब्लोमक्विस्ट ही चित्रपटांतली मुख्य पात्रं.

म्हटलं तर सिनेमे थ्रिलर प्रकारचे आहेत. पण नेहमीच्या जनूबांडी किंवा दोन-दोन फूट परीघाचे दंड बाळगणारे फॅटमॅन, कूगरमॅन किंवा गोलगोलाकार वंडरवुमन वगैरेंशी तुलना करता मोठा बदल म्हणजे लिस्बेथ सालांडर ही जेमतेम पाच फूट उंचीची, आणि अत्यंत काटकिळी आणि स्वीडन या देशात काळ्या केसांची पंचविशीतली मुलगी आहे. ती तशी व्यायाम-बियाम करते; पण तिचा आकार किती, ती मारामारी करणार किती! मात्र कंप्यूटर हॅकिंग या विषयात ती किडा आहे. परिस्थितीपोटी या सगळ्या गोष्टी ती स्वतःच शिकली असावी.

तिला मदत करणारा पत्रकार मिकेल हा मध्यमवयीन, पोट सुटलेला, गोलगोलगोलाकार इसम. सर्वसामान्य पुरुषांमध्ये आढळणाऱ्या माचोपणातून त्याचीही सुटका नाही. तो माचोपणा काय तर, धमक्या, घरावर होणारे हल्ले आणि जिवावर झालेला हल्ला यांमुळे तो जे पत्र चालवतो, त्याची संपादिका म्हणते, "लिस्बेथ सालांडरवर आपण जो विशेष इश्यू काढणार होतो, तो मी थांबवला आहे." मिकेल 'माचो'पणा करून तो इश्यू छापायला अनुमती देतो. आणि संपादिकेला म्हणतो, "मी नाही हे करू धजलो." अर्थ - लिस्बेथला आपल्या मदतीची गरज आहे, मी तिला वाऱ्यावर सोडू शकत नाही.

मिकेलच्या मदतीनं लिस्बेथ निर्दोष सुटणार आणि खलपुरुषांचा बीमोड होणार, हे तसं गृहितक आहेच. त्याशिवाय काय तीन-तीन सिनेमे निघणार. मात्र, लहानपणापासून वडील आणि व्यवस्था यांच्यामुळे नाडली गेलेली लिस्बेथ आनंद शोधू शकते का? तिला कशी माणसं भेटतात; मोकळा श्वास घेतल्यानंतर ती 'नॉर्मल' आयुष्य जगण्यासाठी सिद्ध होते का; असे प्रश्न सिनेमात सोडवलेले नाहीत. मात्र त्याकडे काही निर्देश जरूर आहे.

गेल्या काही दिवसात बघितलेले चित्रपट:

• Terminator 1, 2, 3. चौथा बघायला चालू केलेला पण 10-15 मिनिटातच बोअर झाला. 4, 5 बहुदा कधीच बघणार नाही. मला वाटतं future is not set वगैरे करून त्यांनी घोळ घातला आहे. त्यापेक्षा cursed child, outlander सारखे तुम्ही कितीही प्रयत्न करा भूतकाळ बदलता येत नाही असे दाखवायला हवे होते. ie तिसरा चित्रपट असा हवा होता कि judgment day त्याच दिवशी आलाय; वेगळ्या मार्गाने.

• Spiderman 1, 2, 3 पाहिले. मस्त आहेत. तिसरा जास्त आवडला.

• Amazing spiderman 1, 2 पाहिले. बरे आहेत.

• Batman 1, 2, 3 पाहिले. दुसराच आवडला. बाकी दोन्ही ठीकच आहेत. तिसर्याचा शेवटतर अगदी बाहुबलीसारखा वाटत होता. Spiderman पेक्षा Batman जास्त लोकप्रिय का आहे कळलं नाही. मलातर Spiderman च आवडतो.

हे पाहिलं

२०१६ साली आलेला फ्रेंच भाषेतला सिनेमा "एल्".

गेल्या वर्षी ऑस्करच्या स्पर्धेत असलेल्या चित्रपटांपैकी ( नेहमीप्रमाणे )अनेक राहून गेले होते. आणि (नेहमीप्रमाणेच) जसे जमतील तसे पहाण्याच्या चक्रनेमिक्रमेण घडणार्‍या क्रमामधे एकदाचा या सिनेमाचा नंबर लागला.

"सायकॉलॉजिकल थ्रिलर" या प्रकारात येणारा हा सिनेमा म्हणता म्हणता वर्षाहून जुना झालेला. कान् महोत्सवात नावाजला गेलेला आणि एकंदर आतापर्यंत बराचसा लोकांना ठाऊक असलेला आहे. लैंगिक हिंसा, त्यामागचे सूडाचे, सुप्त लैंगिक फँटसीजचे, त्यानिमित्ताने माणसांच्या नातेसंबंधांचे धागेदोरे असं त्याचं एकंदर स्वरूप. अर्थात "सायकॉलॉजिकल थ्रिलर" म्हणल्यावर थोड्याफार फरकाने हे घटक येणं अपरिहार्य आहेच. नाहीतर सिनेमा कौटुंबिक/सामाजिक स्वरूपाचा नसता का झाला? :-)

सिनेमाची मध्यवर्ती व्यक्तीरेखा असलेली जी बाई बलात्काराचं लक्ष्य बनते त्या व्यक्तिरेखेची गुंतागुंतीची मानसिक स्थिती, तिचा स्वतःचा असा एक मॉरल कंपास, तिची स्वतःची अशी एक नैतिक व्यवस्था - यांभोवती सिनेमा फिरतो. तिचा या बलात्काराच्या घटनेबद्दलचा रिस्पॉन्स गुंतागुंतीचा आहे आणि हा गुंतागुंतीचा रिस्पॉन्स तिच्या एकंदर भावनिक , व्यावहारिक पातळीवरच्या गुंतागुंतीचा एक अविभाज्य असा भाग आहे.

सिनेमातली ही बलात्कारविषयक घटना वगळली तरी हा सिनेमा फ्रान्ससारख्या समाजातल्या आजच्या काळच्या विवाह, कुटुंब आणि इतर व्यावसायिक, सामाजिक व्यवहाराचं, सद्यकालीन स्थितीत माणसांच्या व्यवहाराला आलेल्या स्वरूपाचं अगदी आखीवरेखीव कोरलेलं चित्रण करतो. आणि बलात्काराची घटनादेखील या सर्वात बेमालूमपणे विरघळलेली आहे.

इसाबेल ह्युपर्ट या फ्रेंच अभिनेत्रीने यातली प्रमुख भूमिका केलेली आहे. इतकी विविध पदर असलेली, खोलवरची भूमिका अगदी सहजपणे कशी निभावावी याचा एक आदर्श वस्तुपाठ.

सिनेमा शेवटपर्यंत उत्कंठावर्धक आहे आणि तरीही आंतरराष्ट्रीय दर्जाचं कलात्मक यश त्याने मिळवलं अशी दुर्मिळ प्रकारची किमया इथे साधलेली आहे.

विकांताला पाहिलेले चित्रपट:

Its wonderful life: बरा आहे.

Sound of music: अगदीच फालतू. याला ऑस्कर कसे काय मिळाले? गाणी चांगली आहेत ऐकायला.

North by northwest: हिचकॉक नेहमीच आवडतो. यातली हिरोईन अजिबातच नाही आवडली.

Blow up: आधी पाहिला होता तेव्हा आवडलेला. आतापण आवडला!

Sound of music: लहान मुलांसाठी आहे ना!
ग्रेट डिक्टेटरमध्ये चाप्लिन न्हाव्याच्या भुमिकेत हजामत करतो तेव्हाचे संगीत आवडले होते ते म्हणजे बिथोवनची सिंफनी होती हे कोणी सांगितलं होतं. दृष्याला पारश्वसंगीत नसून संगीताला दृश्य मजेदार.

एका बौद्धपद्धतीच्या लग्नाला जाण्याचा योग आला. पाऊण तासात आटोपलं. सुटसटीत आणि छान!

स्टार वॉर्स द लास्ट जेडाय पाहिला. मस्त आवडला. एकूणच नवीन सेरीज उत्तम घेतलेली आहे. आता लास्ट एपिसोड ९ मध्ये ल्यूक नाही, फक्त च्यूबाका आणि लेआ हे दोनच ओल्डटायमर्स आहेत. पण लेआचे काम करणारी ॲक्ट्रेस काय नाव तिचे, ती तर मरण पावलेली असल्याने पुढच्या पिच्चरात ती नसेलच. मेन लढत ही कायलो रेन आणि ती हिरवीण ऑफ जक्कू यांमध्ये होईल. भारी प्रकार आहे एकूण. कायलो रेन डोक्यानं लैच कमी वाटतोय. नुस्ती बघावी तेव्हा डार्थ व्हेडरची नक्कल करतो.

लहान मुलांसाठी म्हणजे गाणं शिकणाय्रा मुलांसाठी. ७० साली*१ पाहिलाय. आता एक रशिअन का कुठल्या भाषेतला आहे युट्युबवर.
-
*१ असे जुने आमच्यालहानपणी वगैरे ~~

बरेली की बर्फी पाहिला आवडला.
राजकुमार राव काय जबरदस्त आहे राव!! अफलातून! कसली जीव ओतून ॲक्टिंग करतो हा माणूस. त्याची आणि आयुष्यमान खुराणाची जुगलबंदी जोरदार. अल्लारखांचा तबला आणि पंडित रविशंकरांची सितार यांची जुगलबंदी आहे तसे वाटते पाहताना.
क्रिती सनोनने सुद्धा मस्त अभिनय केलाय यात.
बिट्टीचे आई- बाबा, विद्रोहीची आई, चिरागचा मित्र यांनीसुद्धा उत्तम अभिनय केलाय. दिग्दर्शिका आणि संवादलेखक यांचे विशेष अभिनंदन.

शेरलॉक चा सिझन ४ चा पहिला भाग बघितला.
मला तरी अगदी बोगस वाटला. सर्वच चमत्कारिक वाटले. आंतरराष्टीय गुप्तहेरी वगैरे आणुन ह्या लोकांनी मुळ शेरलॉक चा आत्माच बदलला आहे.

अजिबात "इंग्लिश" दर्जाची सिरियल वाटत नाही. उथळ हाम्रिकी दर्जाची मालीका बनवली आहे. आधीचे ३ सिझन बघितले तरी होते, चौथा सिझन पूर्ण बघिन असे वाटत नाही.

बघा. चांगला पॉलिटिकल थ्रिलर आहे

Memories of Murder पाहिला. चांगला आहे. पण खुनी कोण ते कळलच नाही :-(

एचबीओ वर ही नवीन सिरीयल सुरू झाली आहे. "द वायर" वाल्या डेव्हिड सायमन चीच. तसेच डीटेलिंग, "स्ट्रीट" वातावरण वगैरे सगळे आहे. ही ७० च्या दशकाच्या सुरूवातीला न्यू यॉर्क मधल्या 42nd street चा एक पॅच (ज्याला बहुधा "ड्यूस" म्हणत/म्हणतात). तेथील वेश्याव्यवसाय व नंतर पॉर्न इण्डस्ट्री यावर आहे. द वायर मधले एक दोन कलाकार यातही आहेत - तो ड्रग्ज विकणारा डी'अँजेलो व दुसऱ्या सीझन मधला हार्बर वरचा फ्रॅन्क सोबोत्का, आणि इतरही एक दोघे आहेत.

जबरदस्त सिरीज आहे. अजून ८ एपिसोड्स च आले आहेत. जेम्स फ्रँको चे काम मस्त आहे. डबल रोल आहे, जुळे भाउ म्हणून. कोणताही सीन गंभीर किंवा वादावादीचा होत असताना दर २-३ संवादांनंतर मिश्किल पणे काहीतरी बोलून तो हसतो आणि आपल्यालाही हसवतो. मॅगी गाय्लेनहॉल (उच्चार माहीत नाही) ला ही बराच मोठा रोल आहे.

टायगर जिंदा है बघितला. यथातथाच आहे. पण त्यातला एक छोटा सीन आवडला ज्यात आयएनएस मैसूर व आयएनएस तर्कश या दोन भारतीय युद्धनौकांना आखाताकडे रेस्क्यू करण्यासाठी जाणाचे आदेश दिले जातात असं टीव्ही वर सांगितलं जातं. तो सीन. ( क्लेरिकल मिष्टेक आहे त्यात. पण That Indian Govt. dispatches 2 warships to participate in the rescue mission (and to project power), is something. ). हिंदी चित्रपटांमधे हे असं फार कमी वेळा दाखवलं जातं.

१९८१ : ४४४ दिवसांच्या ओलीसनाट्यानंतर इराणने ५२ अमेरिकी नागरिकांना सोडले. >> आता काही दिवसांपूर्वीच Argo पाहिला. छान आहे.

===
काल परत एकदा Ugly पाहिला. लय भारी आहे! कश्यपचा मला सगळ्यात जास्त आवडलेला चित्रपट...

आणि It happened one night पाहिला. दिल है के मानता नही आधी पाहिला असल्याने सगळं माहित होत पण तरी छान वाटला. आजकाल Clark Gable सारखे पुरुष बनत नाहीत वाटतं....कुठे गेली ती उत्क्रांती :-(

अमेझॉन प्राईम घेतल्याने फुकट आलेल्या TV शोज मध्ये जुनीच मेंटॅलिस्ट बघायला सुरुवात केलीय परत .
अत्यंत टपराट अशी बोस्टन लीगल कुठे मिळते बघायला ?

या व्हिडिओत छानछान हत्ती आहेत
Athirappilly to Malakkapparai (via) Sholayar Rain Forest, 12:50

2) ABP MAJHA -
तंजावुरचे भोसले Maratha of Thanjavur, Tamil Nadu, 44:50

ज्युस ही शॉर्ट फिल्म पाहिली. भारी आहे. अवश्य पहा.

विकांताला पाहिलेले चित्रपट:

• फोबिया - सुरुवात जबरदस्त आहे. अगदी पॉज करून १०-१५ मिनिटं ब्रेक घेऊन मग परत चालू करावा लागला. अभिनय अत्युत्तम आहे सगळ्याचा. प्लँचेट सिननन्तरमात्र चित्रपट गंडला आहे असे वाटले. शेवट मलातरी नीट कळला नाही ((स्पॉइलर तिला सगळे prenotions होत असतात का? कशामुळे? बालपणी डोक्यावर पडलेली असते म्हणून? शेवटी ती बरी होते का? /स्पॉइलर))

• WALL.E - तेचते विनाश झालेली पृथ्वी, प्रेम, मनुष्य विरुद्ध मशीन. फारसा आवडला नाही.

• गांधी - फारसे बोलायची गरज नसावी. पण हाफ चड्डी गॅंगला (कोपरापासून?) नमस्कार करत गांधीजींनी केलेली विनंतीमात्र लक्षात राहिली. आणि आंबेडकर हवे होते चित्रपटात.

निवांत वेळ आणि मूड प्रसन्न असल्याने नेटफ्लिक्सावर "क्रेझी एक्स गर्ल्फ्रेण्ड" आणि "अनब्रेकेबल किमी" या दोन मालिका बिंजवल्या.
क्रेझी एक्स गर्ल्फ्रेण्ड साधारणत: म्युझिकल आहे आणि सर्व गाणी भन्नाट विनोदी आहेत. नाव अगदीच गुळमुळीत असलं तरी मालिका मात्र मस्त फ्रेश आहे. रोटन वर दोन्ही मालिकांना दणदणीत लालभडक टमाटे आहेत, त्यामुळे रोटनवरती पुनर्विश्वास बसला. आता "बेटर थिंग्ज" रडारवर आहे.
बाकी पद्मावत पाहायचा चान्स होता पण वरील मालिकांनी दिवस अगदी मस्त गेले.

इंटरनॅशनल फिल्म फेस्टिव्हलमध्ये दाखवणार असलेला अर्जेंटिनाचा "झामा" हा चित्रपट मला आवडला पण तुला बघायचा कि नाही ते तू ठरव असे सिनेगुरुजींनी सांगितले. त्यामुळे तो बघायचा नक्कीच झालं.कुठलाही रिव्ह्यू आणि सारांश न वाचता काय समजतं ते बघायचं अशी वर्ल्ड सिनेमा बघतानाची सवय आहे. सिनेमा सुरु झाला. मध्यमवयीन देखणा नायक झामा समुद्रकिनारी उभा असतो अशी सुरेख चित्रमय चौकट दिसली. सिनेमा सुरु होऊन संवाद सुरु झाले तरी सबटायटल्स दिसेनात. ती मोठ्ठाले आकार धारण करून रसातळाला गेली होती. आम्ही बोंबाबोंब केल्यावर ती लघुरूपात अवतरली.पंधरा मिनिटं काही कळत नव्हतंच पण सबटायटल्स सुरु झाली तरीही नक्की काय सुरु आहे कळेना. पिरियड ड्रॅमा सिनेमातले ते गाव ,तिथली लोकं ,त्यांचं वागणं सगळंच इतकं हास्यास्पद वाटू लागलं कि आम्ही मैत्रिणी अगदी खुर्चीवरून कोसळून पडेपर्यंत हसून हसून मॅड झालो. फिल्म बघायला पंधरा लोकं विखरून बसल्याने कोणाला आमच्या आवाज दाबून हसण्याचा त्रास झाला नाही.
सिनेमात गिचिडमीचिड घरं ,अंधार ,कृष्णवर्णीय दास दासी आणि प्राणी यांची रेलचेल आहे.समजा तीन दासी दाखवल्या असतील तर फ्रेममध्ये एकीचे स्तन उघडे असणे अनिवार्य आहे. तिचेच का बरं उघडे ,बाकीच्यांनी काय गुन्हा केला म्हणून त्यांना झाकपाक करावी लागली काही कळेना. दासाने उपरार्धाचं लज्जारक्षण केलं असेल तर त्याचं लंगोटीवालं बूड हेलकावत जातं. अनेक चित्रमय चौकटी दिसल्या ज्यात एखादा स्तन, नग्न अवयव नसेल किंवा एखादा प्राणी असल्याशिवाय सिनेमा पुढं सरकत नव्हता.केंव्हाही कुठेही अंघोळी चालल्या होत्या.ऑफिसर्स लहर लागली तर पांढरे विग घालून कामकाज करत होते. नम्र सेवक अगदी मालकाला चिकटूनच काम करायचे .त्यामुळे मालकाला केंव्हाही त्याला उगीचच फाडकन मुस्काडून काढायला सोयीचं जाई.एकदा एक लामा (उंटासारखा प्राणी) आता बदलीसाठी व्याकुळ झालेल्या नायकाच्या मानेचा मुका घेतो कि काय असही वाटलं.

नायक एकदा एका मान्यवर स्त्रीला भेटायला जातो तेंव्हाही दास, दासी चिकटूनच असतात.दास दोरीने कुईकुई आवाज करत पंखा फिरवून हवा खेळवत यांच्याकडे अनिमिष बघत असतो. दासी तर नायकासमोरच मालकिणीच्या वस्त्रांचे बंद, उघड बंद करते. तिचेही अनावृत्त अवयव दिसणार कि काय म्हणून नायकाला हुरूप वाटताच पुढे काही घडत नाही.तुझ्या कामासाठी तुला चुंबन दिले पाहिजे पण आत्ता नव्हे म्हणून ती निघून जाते.केवढे हे क्रौर्य !!

एका गावकऱ्याला बहुदा स्थानिक जीवनशैलीचाच भाग असलेल्या मंद हालचाली करणाऱ्या ,तीन सुंदर मुली असतात. तो नायकाला म्हणतो मला मुली असल्याने एका गुंड ,बलात्काऱ्याची भीति वाटते.नंतर एकदा त्या तीन मुली ,नायकाला एक लोटा पर अवर या वेगाने अंघोळ का घालत असतात ते नकळून हसून कोमात जायची पाळी आली होती.त्यातली रिटा बलात्कार झाल्याचे सांगते. काहीतरी विचारायचं म्हणून नायक विचारतो तुला फार जखमी केलं का ग त्यानं ? आं ssss !!!
ऑफिसातला एक क्लार्क कार्यालयीन वेळात पुस्तक लिहितो.ते त्याने का लिहिले याचा वृत्तांत लिहून काढेपर्यंत नायकाच्या त्या गावाहून बदलीसाठीचा अर्ज स्पेनच्या राजाकडे पाठवल्या जाणार नसतो.अशा अनेक अनाकलनीय विनोदी घटना घडत राहतात. अनेक वर्षे वाट पाहूनही नायकाची बदली होत नाही आणि तो एका गुंडाला पकडायला त्या गावातून निघून जातो. त्यानंतर एका आदिवासी टोळीतच अनावृत्त स्त्रिया दिसतात.मग काही स्कोप नसल्याने गुंडांशी चमत्कारिक मारामाऱ्या होऊन शेवटी नायक जखमी होतो आणि सिनेमा संपतो.
हुश्श्श !! विनोदी सिनेमेसुद्धा इतके विनोदी नसतात गडे !

The Game, The Kid आणि Toy Story चे तिन्ही भाग पाहिले. मस्त आहेत सगळेच!

ही मूळची स्पॅनिश सिरीज नेटफ्लिक्स वर आली आहे. मस्त आहे. नेटफ्लिक्स ने इंग्रजीतून ऑडिओ सेटिंग करून दिल्याने सबटायल्स वर अवलंबून राहावे लागत नाही.

स्पेन च्या टांकसाळीतूनच पैसे चोरायचा मोठा प्लॅन आणि प्रत्यक्शात ती "हाइस्ट" अनेक दिवस चालू राहते, ती तशी चालू राहिल्याचा फायदा चोरांनाच मिळतो आणि पोलिसांच्या अनेक स्टेप्स्च्या एक स्टेप पुढे ते असतात हे सगळे एकदम खिळवून टाकणारे आहे.

टोटल बिंजवर्दी.

'संगीत देवबाभळी' या नाटकाबद्दल फार उत्कट प्रतिक्रिया ऐकायला मिळत आहेत. कोणी पाहिलं आहे का? कसं आहे?

Liane Moriarty च्या Big Little Lies या पुस्तकावर बेतलेली HBO सिरीज बघितली. ५० मिनिटांचे ७ भाग आहेत.

पुस्तकातल्या ऑस्ट्रेलियाऐवजी कथानक कॅलिफोर्नियात घडताना दाखवलंय. टायटल ट्रॅक मस्त आहे. आपापल्या ६ वर्षांच्या मुलांना शाळेत सोडायला चाललेल्या आया. पहिल्या दिवशीच Madeline, Celeste आणि Jane यांची गट्टी जमते. Madie आणि Celeste त्याच शहरातील असल्याने आधीपासूनच एकमेकांना ओळखत असतात. Jane नुकतीच तिथे शिफ्ट झालेली single mom आहे. एकेकाळी स्वतःदेखील single mom असल्याने Madie लगेच Jane ला आपल्या पंखाखाली घेते. पहिल्याच दिवशी अशी काहीतरी घटना घडते की नोकरी न करणारी, अर्धवेळ नोकरी करणारी, अतिशय यशस्वी करिअर असणारी असे 'आई'चे वेगवेगळे गट बनतात आणि त्यांच्यात शीतयुद्ध चालू होतं. पुढेपुढे ते वाढत जातं. प्रत्येकजण आपापल्या भूत/वर्तमान काळातले baggage घेऊन वावरत, react होत आहे. पुढेपुढे ते तर हे इतकं वाढत कि एक खूनच होतो.

अभिनय अतिशय उत्तम झाला आहे सगळ्यांचाच. पण खासकरून Nicole, Alexander आणि Laura यांचा उल्लेख करावाच लागेल.

Gone Girl आणि Big Little Lies या दोन निर्मितीनंतर Reese च्या निर्णयक्षमतेबद्दल फारच आदर वाटू लागला आहे.

चाइनिज कॅापी कल्चर -फेक आर्ट पेंटिंगज
L:https://youtube.com/watch?v=ZbZDO5y43ZU

तुम्हाला मोठ्या पडद्यावर फूड पाॅर्न पाहायला आवडतं? - मग गुलाबजाम नक्की पाहा.
सिद्धार्थ चांदेकर म्हणजे अगदी खवा आहे असं तुम्हाला वाटतं? - मग गुलाबजाम नक्की पाहा.
तुम्हाला सोनाली कुलकर्णी चांगली अभिनेत्री वाटते?- मग गुलाबजाम नक्की पाहा.
तुम्हाला ममवचे फर्स्ट वर्ल्ड प्राॅब्लेम्स फील-गुड गोडीत सुटलेले पाहायला आवडतात? - मग गुलाबजाम नक्की पाहा.

हा प्रतिसाद इथे हलवला आहे.