सांग माझी दारू काय वाईट आहे???

छान कारण शोधलसं मी आज प्यालो म्हणून
भान ठिकाणावर आणलंस नशेखोर म्हणून
दारू फक्त निमित्त तुला कारण हवं होत
आज शुद्धीवर आणलंस सोडून जाईल म्हणून

जर गुंगीत ठेवूनही तूच चांगली आहे
तर सांग माझी दारू काय वाईट आहे?

तुझ्या भेटीगाठी तुझे प्रेमाचे देखावे
उगाच रंग भरून स्वतःच दूर व्हावे
मी केले प्रेमच तू जोपासलास छंद
देखावेच होते तुझे आता मिळालेत पुरावे

जर चित्र खोडूनही तूच चांगली आहे
तर सांग माझी दारू काय वाईट आहे?

अखंड साथ लिहिलीस वापरून स्पर्शाची शाई
क्षणाची सोबत आणि दुःखाची अमर्याद खाई
नक्कीच जाशील तू, ती अखंड साथ सोडून
पण स्पर्श तुझा आठवेल मला टोचल्यावर सुई

जर भावनांशी खेळूनही तूच चांगली आहे
तर सांग माझी दारू काय वाईट आहे?

रोजच दिसतात तुझ्या नकारात्मक खुणा,
नक्कीच तू जगशील माझ्याविना
हात तर माझा तू कधीच सोडला आहे
आता वाट फक्त कधी मिटतील पाऊलखुणा

जर वाटेत सोडूनही तूच चांगली आहे
तर सांग माझी दारू काय वाईट आहे?

बस झालं तुझं बस झाली नाटकं
सगळं उघडं पडायला तुझं प्रेमच होत फाटकं
नको विचार आता
काय चांगलं काय वाईट आहे
सध्यातरी माझी ही दारूच चांगली आहे.!!!