फुसके बार – १४ फेब्रुवारी २०१६

फुसके बार – ०२ मार्च २०१६
.

१) दारूला प्रतिष्ठा

लग्न झाल्यावर साधारण वर्षभरातच एका जोडप्याचा घटस्फोट होण्याचे कारण काय असावे? पत्नी सोशल ड्रिंकर होती. त्याच्या मागे लागली होती की त्यानेही पिण्यास सुरूवात करावी. आता याच्या वडलांच्या प्रमाणाबाहेर दारू पिण्यामुळे त्याच्या आईच्या संसाराची वाताहात झालेली, वडील दारू पिण्यामुळे लवकर गेले, तेव्हापासून आईने कष्ट घेऊन मुलांना वाढवलेले. हे सर्व मुलांनी पाहिलेले. त्यामुळे हा दारूचा तिरस्कार करणारा. माझ्या दारू पिण्यामुळे आईला फार मनस्ताप होईल, शिवाय त्याचा पुढे स्वत:च्या मुलांवर कसा परिणाम होईल याचा नेम नाही. त्यामुळे दारू न पिण्याचा याचा निश्चय.

तेव्हा या विसविशीत माणसाबरोबर आयुष्य काढणे तिला अशक्य झाले, आणि अर्थात घटस्फोट हा त्यावरचा सर्वात सोपा उपाय.

आणि आता तुषार नातूंनी उल्लेख केलेले हे उदाहरण पहा.

“तो पहिल्यांदा आमच्याकडे २००७ साली उपचारांना आला तेव्हा बायकोने त्याच्या दारुला कंटाळून घटस्फोट घेतला होता. त्याच्या कुटुबियांनी ५ वर्षाच्या मुलाला आमच्या कडे ठेवा असा आग्रह केला तर जास्त वाद न घालता मुलगा त्याच्याकडेच ठेवून ती निघून गेली. इतकी वैतागली होती याच्या दारूला. जेव्हा त्याचे पालक आंम्हाला भेटायला आले तेव्हा त्यांनी आमची सुन कशी नालायक होती याचे वर्णन करुन घटस्फोट आंम्हीच घेतला असे सांगून मुलाचे समर्थन केले.
नंतर तो जेमतेम चार पाच महिने चांगला राहीला. लगेच घरच्यांनी त्याचे दुसरे लग्न करुन दिले. अन वर्षभरात पुन्हा व्यसनमुक्ती केंद्रात दाखल झाला. बाहेर पडल्यावर पुन्हा व्यसन सुरु केले. मग दुस-या बायकोने पण घट्फोट घेतला.
त्या दु:खात तो जास्ती प्यायला लागला. त्या बायकोने असे करायला नको होते. तिच्या माहेरचे लोक ठिक नव्हते. त्यांनीच तिला फुस लावून घटस्फोट घ्यायला लावला असे याच्या कुटुंबियानी आम्हाला सांगत पुन्हा याची बाजू घेतली.
मग पुन्हा एकदा उपचार घेतले. वर्षभर चांगला राहीला अन मग तिसरे लग्न लावले कुटुंबियांनी याचे. आता पुन्हा दारु प्यायला सुरुवात केलीय.
आम्ही कुटुंबीय त्याला उपचार केव्हा देतील याची वाट पहातोय. शिवाय आता तिसऱ्या पत्नीने घटस्फोट घेतला तर याचे पालक काय समर्थन देतील हे पण ऐकायचे आहे.
अजून एक महत्वाचे. एकाही उपचारात याच्या पालकांनी कधीच आमच्या केंद्राची पूर्ण फी भरलेली नाहीय.
आपला मुलगा नालायक आहे हे जोवर पालक स्वीकारत नाहीत तोवर खरी सुधारणा होणे कठीणच असते.

२) यदा यदा हि धर्मस्य ग्लानिर्भवति भारत हे तर नेहमी ऐकतो. तो काही युगे युगे ‘संभवत’ नाही, त्यामुळे त्यातली निरर्थकता कळलेली आहे.

हे संभवामि युगे युगे प्रकरण उगाच भोळ्यांची समजुत घालण्यासाठी आहे हे खरे.

पण जेव्हा जेव्हा उकाडा असह्य होतो, तेव्हा आभाळ भरून येते आणि पाऊस पडून वातावरण थोडेफार तरी सुसह्य होताना दिसते. येथे निसर्ग बहुतेक वेळा आपले काम करताना दिसतो (ती व तो भेटले व निसर्गाने काम केले या अर्थाने नव्हे).

३) कोरा या वेबसाईटवर टाइम्स नाऊच्या अर्णब गोस्वामीचा पगार महिन्यास एक कोटी इतका असल्याचे म्हणले आहे. आरडाओरडा करण्यासाठी एवढे पैसे मिळतात याबद्दल तेथे आश्चर्यही व्यक्त केले गेले आहे.

४) तिसरी मुंबई परिसरातील जमीनविक्रीतील फसवणूक

मराठी चित्रपटसृष्टीतल्या अभिनेत्यांना हाताशी धरत सध्या टीव्ही – वर्तमानपत्रांमध्ये महाराष्ट्रभर व त्यातही विशेषत: नव्याने उदयास येत असलेल्या तिसरी मुंबई परिसरात प्लॉटविक्री करण्याच्या मोठमोठ्या जाहिराती सध्या दिसतात. मागे पुण्याजवळ शिंदेवाडी येथे दोनएक वर्षांपूर्वी तुफान पाऊस झाल्यानंतर तेथे केलेल्या अनधिकृत बांधकामामुळे एका कार वाहून गेल्यामुळे दोघांचा मृत्यु होण्यास जबाबदार असलेल्या एकावर या निमित्ताने खटला चालू आहे. या व्यक्तीवर मोठाच राजकीय वरदहस्त असल्यामुळेच त्याच्यावर ती कारवाई न करण्याबद्दल मोठा दबाव होता असे बोलले जात होते. मोठ्या उशीराने त्या व्यक्तीने तेथे केलेले अतिक्रमण पाडण्यात आले व नंतर त्याच्या जमिनीचा लिलावदेखील करण्यात आला होता. ही व्यक्तीच आता त्याहीपेक्षा प्रचंड प्रमाणावर मोठ्या जमीनविक्री रॅकेटच्यामागे असल्याचे बोलले आहे. अशा जाहिराती करणा-या या कंपनीच्या प्रवर्तकांची नावे विचारली असताना उडवाउडवीची उत्तरे दिली जातात.

तिसरी मुंबई म्हणून उदयास येणा-या भागामध्ये प्रत्यक्षात हातात फारशा जमिनी नसतानाही मोठमोठ्या जाहिराती करून लोकांना फशी पाडत आहे. प्लॉट्स पाडताना रस्त्यासारख्या किमान गरजांसाठीही जागा मोकळी न सोडता सगळी जागा विकून मोकळे होत आहेत. जमीन विकताना खरेदीदाराची जमीन नक्की कोठे असणार याची निश्चित माहिती दिली जात नाही. अशी परिस्थिती असताना लोकांकडून फ्लॅटचे बुकिंगदेखील घेतले जात ऄअशा प्रकारे लोकांची उघडउघड फसवणूक होत आहे.

सरकारने या प्रकारांमध्ये वेळीच हस्तक्षेप करून या प्रकारांना आळा घालणे गरजेचे आहे. अन्यथा येत्या काळामध्ये खूप मोठा घोटाळा उघड होण्याची शक्यता व्यक्त केली जात आहे.

पुण्यातल्या गुंठामंत्र्यांप्रमाणेच या भागातही जमिनी विकून आलेल्या पैशातून अचानक श्रीमंत झाल्यामुळे महागड्या गाड्या उडवणे, प्रचंड खर्च करून लग्ने करणे हे नेहमीचे झालेले आहे. वधुवरांनी लग्नस्थळी हेलिकॉप्टरमधूनच यायला हवे असा जणू अलिखित नियम झालेला आहे. यामुळे लग्नामध्ये वायफळ खर्च केला जाऊ नये यासाठी तेथील लोकांचे समुपदेशन केले जात आहे.

५) रेल्वे बजेट, प्रभू व बच्चन

रेल्वेचा अर्थसंकल्प सादर करतेवेळी मंत्री सुरेश प्रभू यांनी हरिवंशराय बच्चन यांच्या कवितेतील काही भाग वापरला. भाषणापूर्वी त्यांनी अमिताभ बच्चन यांच्याशी त्याबाबत चर्चा केली. शिवाय अर्थसंकल्पाचे भाषण सादर केल्यानंतर त्यांनी पुन्हा बच्चन यांना फोन केला व त्यांच्याकडून त्या कवितेचे सादरीकरण व्यवस्थित झाले का हेदेखील विचारले.

६) इशरत जहान यह नाम मैं ने सुना था और पोलिस के साथ चकमक में वह मारी गयी थी ऐसा डेव्हिड हेडलीने कहा। – उज्ज्वल निकम यांच्यावरच कोणी हिन्दीला भ्रष्ट करण्यावरून खटला भरला तर आश्चर्य वाटायला नको.

७) सतत चिडणा-या व्यक्तीला शांत करण्याचा हमखास उपाय म्हणजे तिला फुटबॉल खेळायला प्रोत्साहन देणे. आता खेळ म्हणल्यावर आपल्याकडील बॉल सतत आपल्याकडे राहणार नाही, कोणी तरी तो आपल्याकडून हिसकावून घेण्याचा प्रयत्न करणारच; तेव्हा त्याबाबत सतत चिडून खेळणे चालणार नाही हे सत्य तिला त्यानिमित्ताने जाणले तरी तिचे उर्वरीत आयुष्यही सुख-संयमात जावे.

फुसके बार – ०३ मार्च २०१६
.

१) एखादी कविता लिहून झाल्यावर कालांतराने ती आपण कोणत्या अर्थाने लिहिले असेल बरे, असा स्वत: कवीचाच गोंधळ होण्याचा प्रकार झाला, असे होत असेल का?

२) संस्कृतींमधला फरक?

दोह्यात असताना माझ्या गो-या मित्राबरोबर मसइदच्या प्लॅंटमध्ये जात होतो. तो गाडी चालवत होता. समोर एका अरबाची गाडी होती. तो बराच वेळ त्याला ओलांडून जाण्यास जागा देत नव्हता. अखेर थोडे पुढे गेल्यावर त्याने नाइलाजाने गाडी स्लो लेनमध्ये घेतली. आमच्या गो-याने थॅंक्यु म्हणत त्याला अंगठा दाखवला. झाले, तो अरब ड्रायव्हर पिसाटला. गाडीचा वेग वाढवून आमच्या गाडीच्या पुढे आणून आमची गाडी थांबवायला भाग पाडले. गाडीतून उतरून तरातरा आमच्या गाडीकडे आला आणि काही कळायच्या आतच आमच्या मित्राच्या थोबाडीत मारली आणि म्हणाला पुन्हा अंगठा दाखवशील तर अंगठाच कापून टाकीन.

दोन संस्कृतींमधील फरक वगैरे म्हणण्यापेक्षा कोणी गोरा असो की आणखी कोणी, आमच्या देशात आम्हीच राजे हा माजच त्यामागे दिसत होता.

३) पप्पू जस्ट कान्ट डिलिव्हर साला

सध्याचे अधिवेशन सुरू होतेवेळी पप्पूने मोठ्या वल्गना केल्या होत्या की हे सरकार मला घाबरते, त्यामुळे मला संसदेत बोलू दिले जाणार नाही.

मात्र या बढाया मारल्यानंतर आज पप्पूने अपेक्षेप्रमाणे त्याच्यावर आशा लावलेले कोणी असेलच, तर त्या सा-यांना तर त्यांना तोंडघशी पाडले. जवळजवळ प्रत्येक वाक्यानंतर मान खाली करून खाली लिहिलेले वाचणे आजही चालू राहिले. ‘पप्पू कान्ट डिलिव्हर साला’ हे त्याने सिद्ध केले. पुन्हा एकदा. शेवटचे साला हे पप्पूला उद्देशून नाही.

मध्येच त्याने सत्ताधा-यांना उद्देशून तुम्ही सावरकरांना फेकून दिलेत का असे पुन्हापुन्हा म्हणण्याची मर्दुमकी मात्र दाखवली. यावरून हे भाषण त्याला मणिशंकर अय्यरनी लिहून दिले होते की काय अशी शंका आली. कॉंग्रेसवाल्यांनी या ठोंब्याच्या बाळबोध विधानांवर व आविर्भावावर मधूनमधून टाळ्या वाजवत त्याचे अर्थहिन व निर्जीव भाषण उचलून धरण्याचा प्रयत्न केला, पण ते प्रभावी झाले नाही ते नाहीच. ते तसे झाले असते तरच काळ्या धनाला पावन करून घेण्याच्या बजेटमधील घोषणेला त्याने दिलेल्या ‘फेअर अँड लव्हली’ या उपमेला काही वजन प्राप्त झाले असते.

माझी भावना अखेर जेटलींनी बोलून दाखवली. ते म्हणाले की राहूल गांधींना बोलताना ऐकले की नेहमीच हा प्रश्न पडतो की त्यांना खरेच काही माहित आहे का आणि त्यांना खरेच केव्हा काही माहित होईल. (कधी तेवढी समज येईल).

४) सुकाळ हा शब्द दुष्काळ या शब्दाच्या विरूद्ध अर्थाने म्हणून वापरला जातो, तरी अमुक गोष्टींचा सुकाळ झाला आहे असे जेव्हा आपण म्हणतो, तेव्हा तो शब्द अनेकदा चांगल्या अर्थाने वापरलेला नसतो. काय कारण असावे याच्यामागे? सुकाळ या शब्दाच्या योग्य वापराबद्दल काय करता येईल?

५) जेएनयुमधील विद्यार्थी नेता कन्हैयाकुमार याला अंतरिम जामीन मिळण्याची बातमी हा एक प्रकारचा अँटीक्लायमॅक्स झाला. त्याला जामीन तर मिळाला, परंतु विद्यापीठात यापुढे देशविरोधी घोषणांची घटना यापुढे होणार नाही याची काळजी तेथील प्राध्यापक व प्रशासन या दोघांनीही घ्यावी अशी सूचना उच्च न्यायालयाने केली आहे. देशविरोधी घोषणांचे इन्फेक्शन या विद्यापीठाला झालेले दिसते, ते धुवून काढले पाहिजे व बरे केले पाहिजे असे निरिक्षणही न्यायालयाने नोंदवले.

दुसरीकडे वकील वृंदा ग्रोव्हर म्हणताहेत की सुरूवातीला पुरावा म्हणून न्यायालयात सादर केलेला व्हिडियो बनावट असल्याचे आजच स्पष्ट झाल्यामुळे ही बाब कोर्टापुढे आणता आली नाही. त्यामुळे न्यायालयाने तशी निरिक्षणे नोंदवल्याचे त्या म्हणाल्या.

६) पूर्वी चित्रपट चालू होण्याआधी चित्रपटगृहात एक वार्तापट किंवा डॉक्युमेंटरी दाखवली जाई. माझा एक मित्र आहे. तो कोणत्याही सिनेमाला जाताना नेहमीच वेळेत जाण्यासाठी आग्रही असे.
त्याचे म्हणणे असे की ही डॉक्युमेंटरी, नंतर दाखवले जाणारे सेंसर बोर्डाचे सर्टिफिकेट हे सारे पाहणे गरजेचे असते. सर्टिफिकेटमध्ये सिनेमाची किती रिळे आहेत हे दाखवले जाते, तेही पाहिले पाहिजे. अशा प्रकारे प्रत्यक्ष सिनेमा सुरू होण्यापूर्वी छान वातावरण निर्माण झाले पाहिजे असा त्याचा आग्रह असे.