रसज्ञ नरभक्षक
कां उगीच घाबरतोय आम्ही?
कां उगीच गळा काढून रडतोय?
कां उगीच त्यांचा वारसा सांगतोय?
तो नरभक्षक चटावलाय
आपला क्रुस
आपल्याच खांद्यावरून वाहणार्या
महात्म्यांच्या रक्ताला
तो क्रुस खांद्यावरून वाहण्यासाठी
खांदे मजबूत लागतात
ख्रिस्तासारखे
गांधीबाबासारखे
दाभोलकरांसारखे
पानसरेंसारखे
आजन्म व्रतस्थ जनसेवेतून
बहूमताच्याही विरोधात सत्यच सांगेन
अशा निर्धारी आचारातून
ऋशींनाही लाजवेल
अशा निर्मोही चारित्र्यातून
मजबूत होतात असे खांदे
आमची जनसेवा
सोयीची आणि सवडीची
थोडेसे दमल्यावर
कुणी लालूच दाखवल्यावर
कुणी धमकावल्यावर
क्रुस टाकून पळून जाणारे भेकड आम्ही
आमचे रक्त चालत नाही त्याला
भुकेला तरी
चवीचा रसज्ञ आहे तो
- देवदत्त परुळेकर
प्रतिक्रिया
तेवढं ते
ऋशींनाही
तेवढं ते 'ऋषींनाही' असं बदला हो कुणीतरी! नाहीतर 'म्हशींनाही' असं वाटून जीव वरखाली होतोय.
बाकी चालू द्या.
+१
माझ्या मनात अगदी असाच विचार आला.
कवितेकरिता चांगली कल्पना
हत्या त्यातल्या त्यात प्रभावी, कार्याला वाहून घेतलेल्या लोकांची होते. कवितेकरिता चांगली कल्पना आहे.
असंच म्हणतो.
असंच म्हणतो.