लग्नाआधी सेक्स म्हणजे बलात्कार असेलच असे नाही: मुंबई उच्च न्यायालयाचे भाष्य

बातमी रोचक आहे. पण त्यातले खालील उल्लेख बुचकळ्यात पाडून गेले.

तक्रारदार तरुणी सुशिक्षित आहे आणि तिने समजून-उमजून राहुलशी शारीरिक संबंध ठेवल्याचं प्रथमदर्शनी दिसून येतं

भादंविच्या ३७६व्या कलमानुसार, एखाद्या गरीब आडाणी मुलीला लग्नाचे अमिष दाखवून कोणी तिच्याशी शरीरसंबंध ठेवले

आँ ?!

शिवाय जस्ट बादवे, अशा प्रकारच्या खटल्यांमधे पुरुष आणि स्त्री या दोघांची नावे पब्लिकली डिक्लेअर करता येतात मीडियाला? बदनामी होईल अशा केसेसमधे विशेषतः स्त्रीचं नाव छापता येत नसावे अशी समजूत होती. इथे कुठे नाव बदलून छापले असल्याचाही उल्लेख दिसला नाही.

संमतीने शरीरसंबंध ठेवले व नंतर काही काळाने व काही कारणाने जर स्त्रीला तो संबंध ही चूक वाटली तर ती बलात्कार हा गुन्हा दाखल करते. फसवून ठेवलेले शरीरसंबंध,आमिष दाखवून ठेवलेले शरीरसंबंध, हा बलात्कार ठरवल्यामुळे बलात्कारांच्या केसेसची संख्या एकदम वाढते. प्रत्येक अनैतिक संबंधांची नोंद बलात्कार म्हणुन करावयची झाल्यास ही संख्या अजून खूपच वाढेल. बलात्कार या शब्दाचा अर्थ शारिरिक बळाचा वापर करुन जबरदस्तीने इच्छेविरुद्ध केलेला संभोग असा अर्थ पुर्वी घेतला जायचा. त्यामुळे केस चे गांभीर्य वाढायचे. आता जणु हे नेहमीच झाले आहे म्हणुन बातम्यांकडे दुर्लक्ष करण्याचा कल वाढला आहे असे मला वाटते. कोर्ट निकालाबरोबर सुचक भाष्यही करते त्यामुळे एक दिशा जी मिळते ती कायदयांमधील बदल करायच्या वेळी विचारात घेतली जाते.

राहुलने आपला बचाव करताना 'आम्ही परस्परसंमतीनेच संबंध ठेवले होते. मात्र, दोघांचा धर्म वेगळा असल्यानं लग्न करू शकत नाही,' असं न्यायालयात सांगितलं. >> हा बचाव पटतोय का? मंजे प्रेम/सेक्ससाठी धर्म, जात आड येत नाही पण लग्नासाठी येते. हे मला तकलादू कारण वाटत. अशा केसेससाठी चेक बाउंससारखी ब्रिच ऑफ प्रॉमिसची सोय असावी असे सध्यातरी मत आहे. जेवढा काळ नातं होतं त्याकाळात गर्भपात वगैरेमुळे शारिरीक, मानसीक नुकसान झाले असल्यास त्याची मॉनेटरी भरपाई मिळावी.

'लग्नाआधी सेक्स म्हणजे बलात्कार असेलच असे नाही: मुंबई उच्च न्यायालयाचे भाष्य'
या मथळ्यावरून पुर्वी गदारोळ झालेला एक मथळा आठवला
'Pre-marital sex equals marriage, says Madras HC - Hindustan Times'

तर आता माझी शंका ही आहे की:
लेखातील बातमीत ज्या अशील आहेत त्यांच्याकडे गर्भपातच्या वेळची कागदपत्र असावीत. मंजे she had proof of relationship. तर ती कागदपत्रं घेऊन अशील कोर्टात गेली असती तर लग्नाचे सर्टीफीकेट मिळालेच असते ना? मग तो मार्ग का वापरला गेला नाही?

लैंगिकता ही एक मानसिकता आहे व त्याचा नैतिकतेशी थेट संबध जोडल्यामुळे सगळे घोळ होतात. योनिशुचिता ही भानगड जर अस्तित्वात नसती तर या प्रश्नाकडे आपण कसे पाहिले असते? स्त्रीपुरुष संबंध ही पुरुषाची एकतर्फी गरज या दृष्टीने पहाणे व परस्परांची गरज (प्रपोशनचा भाग जरा बाजूला ठेवू) यात जो फरक पडतो त्यामुळेही या गोष्टीकडे पहाणे बदलते. राहतो प्रश्न कायद्याच्या चौकटीचा. मग बलात्कारा ऐवजी लैंगिक फसवणुक केली असे म्हणण्याची व त्याला विशेष फसवणूकीचा दर्जा देउन पिडित व्यक्तीला (सध्या आरोप करण्याला पिडित म्हणु या) नुकसान भरपाई द्यायची व्यवस्था करता येईल का? असा प्रश्न उपस्थित होतो. जर अशी व्यवस्था करता येत नसेल तर लैंगिक फसवणुक चे भांडवल करुन परिस्थिती बलात्कारात रुपांतरीत करावी लागते.
अब्रूच्या भीतीने अनेक स्त्रिया खरे बलात्कार सुद्धा न्यायालयीन कक्षेत आणत नाहीत.अर्थात अन्यही कारणे असतील. एकंदरीत मुद्दा हा कितिही चघळला तरी कमीच आहे.